2015年1月20日 星期二

祖兒聽媽咪話盡快嫁 祖兒,容祖兒,




自小與母親相依為命的樂壇天后容祖兒,出道15年,一直靠母親的愛與支持,才能在事業上屢創高峰。早前自爆停工半年陪母親抗癌的祖兒,前晚在《勁歌金曲頒獎典禮》橫掃4個大獎,更獲頒「最受歡迎歌手十年大獎」,令她感受至深!自責連累母親患病的祖兒,不諱言會聽媽媽的話盡早嫁人,以免媽媽擔心!

連奪多個獎項的祖兒攞埋「最受歡迎歌手十年大獎」,實至名歸!

大批粉絲準備定架生,賀祖兒「十年稱霸」!

祖兒性感登場勁歌熱舞。

軒仔與祖兒為對方攞獎而高興!

容祖兒是圈中出名孝順女,經常與母親孖公仔出埠工作及旅遊,儼如糖黐豆!月初自爆媽媽不幸患癌的祖兒,為全力陪伴母親抗癌,甘願停工近半年損失逾千萬!猶幸皇天不負「孝心人」,祖兒媽媽成功擊退癌魔,祖兒更在前晚的《勁歌金曲頒獎典禮》掃走4個大獎,包括壓軸獲頒新增的「最受歡迎歌手十年大獎」!成為大贏家的祖兒在後台受訪時,提起母親時心情仍然激動,更揚言可為母親放棄事業嫁人!

攞「十年大獎」感鼓舞

與媽媽母女情深的祖兒,坦承每次提起媽媽都難忍眼淚。雖然今年樂壇成績優異,惟她自責為母親增添壓力,更連累媽媽患病:「一直以來唔係忽略家庭,以為一齊拚搏,但反而似累咗佢咁,媽咪係好緊張嘅人,我就超級樂觀不拘小節,有時叫佢拎啲嘢,都會畀到佢無形嘅壓力,無論工作點成功,家人健康兼顧唔到都係失敗。」

問到祖兒會否考慮提早嫁人,屆時可有「半邊仔」照顧自己,與媽媽一同分憂?她怕醜地說:「呢樣嘢當然就……其實阿媽最想我唔使做,但我真係做緊我鍾意做嘅嘢,等再觀察吓先」侍母至孝的祖兒,承諾盡快定下「嫁期」,免媽媽擔心她而影響健康致病!

有指英皇與無綫重修舊好,造就祖兒十度封后兼奪「大獎」,她自言主力表演及講感言,獎項則由公司安排統計,但會將每人對自己的好銘記於心!提到是否對奪得「最受歡迎歌手十年大獎」知情時,她說:「知!唔係點會換晒衫,不過唔係早知,係叫咗我安排一段表演。得到呢個獎都好鼓舞,因為好多時講唔到咁多感想,咁多年嚟好多片段,每年都會睇番,又會睇自己有咩講錯,下次講好啲。」她今次獲頒終極大獎,下次可能要攞「金針雲耳」獎才行,她笑說:「金針雲耳都唔錯,依家地球暖化咩都會發生,可能下年就攞,佢畀得起我攞得起。」

被Cut片笑住賴軒仔

祖兒對獲頒「十年金牌」大表感動,更笑言「毛管戙」!惟電視最後只播出一首歌,令認真綵排的祖兒大感失望,更笑言是因為張敬軒奪「最受歡迎男歌星」時感言太多:「咪係囉!真係有《金枝慾孽》o架!畀佢搶晒時間,但佢攞獎我都好開心,佢係我最好朋友之一,今年大家各有挑戰,佢做完舞台劇有情緒方面(問題),我就家庭方面(問題),大家互相鼓勵,夜闌人靜會短訊畀大家。」 另外,無綫接獲幾宗投訴,指不滿因趕播晚間新聞而Cut走祖兒獲「最受歡迎歌手十年大獎」的得獎感言。

連奪多個獎項的祖兒攞埋「最受歡迎歌手十年大獎」,實至名歸!

大批粉絲準備定架生,賀祖兒「十年稱霸」!

祖兒性感登場勁歌熱舞。

軒仔與祖兒為對方攞獎而高興!



鍾意就快D Share啦!
Related Posts Plugin for WordPress, Blogger...