掃呢頁CODE去手機

2015年1月31日 星期六

黃日華「華Dee」上身 型爆點煙 陪梁潔華睇二手勞 黃日華,梁潔華,




【狗仔出更】黃日華「華Dee」上身 型爆點煙 陪梁潔華睇二手勞

2015-01-31 22:19:00



(採訪、攝影:吳耀輝、羅德光)

舊年梁潔華被證實患有血癌,經過治療,同埋有老公黃日華同囡囡黃芷晴嘅關懷同照顧,康復嘅進度非常理想。

日前黃日華同梁潔華專程去欣賞囡囡黃芷晴行時裝騷,華哥對華嫂呵護備至,人前人後經常鼓勵華嫂,除咗話會努力置業,仲大爆愛妻宣言話:「係應該要做,我寧願辛苦啲,都想佢身體好啲,一切都值得。」果然華哥就好像所有人心目中嘅郭靖一樣,鐵血單心,用情至專。

近期華哥都好多嘢做,成日都要中港兩邊走,不過佢一有時間就會陪住華嫂,日前華哥同華嫂就被發現喺尖沙嘴拍拖,大約下午6點左右,佢哋喺加拿芬道一間專門賣勞力士嘅二手錶舖門口睇嘢,邊睇就邊傾,華哥似乎對櫥窗嘅勞力士好有興趣,不過華嫂一行開,華哥即刻尾隨其後,依依不捨咁回望櫥窗嘅手錶,真是望門輕嘆,皆因置業艱難呀!

之後華哥同華嫂拍拖去到街口嘅咪錶位攞車,華哥先行陪華嫂上車休息,然後走到對面馬路嘅垃圾筒。佢喺袋入面拎咗一包煙,準備用打火機點起手上嘅煙,但係用咗好耐都點唔着,畫面十分搞笑。

之後華哥時光倒流八十年代,用「華Dee式」點煙方法,以外套擋風成功點着手上嘅煙狂抽,用最短嘅時間抽完一支煙,明顯係唔想華嫂久等,然後急步跳上座駕,驅車離去。



兩公婆一齊睇勞。



梁潔華一行,華哥就跟住佢。



先送華嫂上車。



點唔著支煙。



華Dee式點煙。



鍾意就快D Share啦!