【短片】【生日盡興】松岡倒奶 掩護林德信
2015-01-31 07:15:00
日籍模特兒松岡李那同男友林德信（Alex）拍拖，喺人前玩避忌，就算俾Alex爸爸林子祥喺訪問中踢爆二人感情穩定，兩人都未有意思公開戀情。前晚松岡同友人喺灣仔王子酒店打邊爐慶祝29歲生日，而Alex就喺銅鑼灣出席完Adidas活動後匯合。
身為壽星女嘅松岡悉心打扮，一身白色低胸短裙，谷爆上圍同露出事業線，心情更high爆。踏正十二點生日，松岡同王友良落樓送客，佢全程風騷同女友人齊齊孖妹擺甫士畀記者任影，之後又雙手合十許願，笑笑口兼送飛吻，佢話：「新年快樂、恭喜發財、心想事成、身體健康。」
之後松岡同王友良返上食肆，大概十分鐘後再同六、七個友人離開，友人幫松岡拎住幾袋生日禮物，齊齊等七人車到。上車前，記者問佢男友Alex喺邊，松岡笑笑口唔出聲，之後就鞠躬倒奶同大家拜拜。
原來二人又玩前後腳，松岡引開記者，十分鐘後，Alex同兩名男友人離開，記者上前影相，Alex一臉尷尬，問到送乜禮物畀女友時，佢一邊急行一邊笑，之後就同友人坐的士走，估計佢哋搭車匯合松岡仲有下場慶祝。
松岡同Alex玩地下情，樓下玩避忌，樓上則open得多，松岡喺自己instagram就貼了生日會的大合照，見松岡同Alex當然坐埋一齊，喺朋友堆中公然搭住男友膊頭，二人嘅拖友關係早已公開。
(採訪、攝影：梁繼光、畢紹基)
林德信喺松岡離開十分鐘後落樓，提到女友佢又笑笑口。
鍾意玩前後腳嘅一對情侶，影大合影就搭晒膊頭。(互聯網圖片)
松岡李那見大批記者守候，上車前即鞠躬派奶。
|
鍾意就快D Share啦！
|
|
|
