2015年4月12日 星期日

阿Bob稱睇片先知個魔術咁變 FB多謝Louis 阿B,林盛斌,Bob,鍾鎮濤,



阿Bob稱睇片先知個魔術咁變 FB多謝Louis

2015-04-12 15:25:00



係咪真係唔知點變先?

大台節目《至尊街頭魔法王》最近引起熱議,竟然係因為一個杯麵。話說節目內嘅魔術師Louis(甄澤權)將一個杯麵由冇變有,點知過程就俾網民喺街外影到佢穿崩,仲放埋上網,主持之一嘅阿Bob就喺網上鬧爆個網民係「缺德」,而喺今日,阿Bob又喺facebook回應呢件事。

阿Bob話:「由第一輯開始,整個《街頭魔法王》嘅製作團隊將一幕又一幕神奇魔術帶俾觀眾,都係希望大家睇得開心!

「對於嗰段唔知邊個拍同唔知點解要拍嘅片段,我想講我都係睇到條片先知原來個魔術係咁變!

「所有魔術都係一個精心創作,相信冇人會認為 David Copperfield 真係變走咗自由神像,Criss Angel真係將d人分開一半,其實都係依靠表演者,助手,道具,手法,角度等等多方面配合演出,令現場同電視觀眾都感到魔術嘅神奇!

「當你知道個秘密之後,好肯定多數都會話:『超!乜原來係咁㗎咋?』所以所有表演者同幕後團隊都會盡力保守每一個魔術秘密,但係一段片段就可以將所有心血徹底摧毀,即係俾我見到你點變,我唔會拍底,更唔會公開,因為,我尊重每一個創作!

我要再一次衷心感謝整個魔法王台前幕後工作人員,喺過去兩個星期為各位觀眾帶嚟無數歡樂,特別係 Louis,多謝你,『俾d掌聲先』」

但係其實依家網民講緊嘅唔係個魔術真唔真,而係個節目叫《街頭魔法王》,咁應該係俾街頭嘅觀眾睇,但呢個「杯麵」魔術,好明顯就係畀電視嘅觀眾睇,因為拍條片嗰位網民,正正就係喺「街頭」,但點解佢睇到嘅唔係魔術,而係穿崩呢?所以話,如果改名做《電視魔法王》的話,其實係冇問題。

至於阿Bob話:「我想講我都係睇到條片先知原來個魔術係咁變!」喺條片都睇到,成間便利店都係大台嘅工作人員,嗰位換走杯麵嘅工作人員又唔係特別隱匿,所以阿Bob係咪真係唔知呢?咁就要大家諗諗喇。



阿Bob:「我想講我都係睇到條片先知原來個魔術係咁變!」

鍾意就快D Share啦!
Related Posts Plugin for WordPress, Blogger...