羅霖強勢50胸踩入樂壇
最近發生在美魔女羅霖身上的奇迹一個接一個！她先以50歲之齡兼三子之母的身份推出處女寫真，憑其凍齡美貌與身材，遠至墨西哥及英國都有相關報道，令她成為國際紅人；昨晚羅霖為寫真舉行祝捷會時，又宣布加入樂壇，頭炮找來歌手馬嘉均與她合唱壯膽，實行成為「半百」樂壇新人！而羅霖昨日現身寫真簽名會，又表示寫真銷量勁，會發布全世界：「咩奇迹都會發生！」
「50胸」羅霖昨日為其寫真集舉行簽名會，晚上則舉行祝捷晚宴慶祝寫真大賣，羅霖即場宣布再次挑戰自己，以50歲之齡殺入樂壇當歌手。
在祝捷會上羅霖大展歌喉，與歌手馬嘉均合唱，其後羅霖表示：「公司諗住同馬嘉均合作，由佢作歌，我同佢合唱，進軍樂壇。」她指踏入樂壇是重大考驗：「半百先嚟做歌手，加上我結婚生完小朋友後，就冇再去唱卡拉OK，冇機會練歌。我好鍾意唱歌，所以嚟緊要拜師學藝，大家都知我對自己要求好高，如果五音不全就唔會出嚟見人。」
寫真發布全球
除了唱歌外，羅霖的工作多籮籮，她透露稍後將與薛家燕合作拍攝微電影，內容與小朋友有關，她會飾演家長，並希望日後可作不同嘗試，更揚言不介意扮演醜角。
羅霖又感謝母親出席其簽名會和祝捷會，並哽咽說：「媽咪已經75歲，都嚟支持我，總之冇我媽咪就冇今日嘅羅霖，好記得媽咪講過『我哋一家人有飯食飯，有粥食粥』。有今日嘅成績係我媽咪嘅功勞，總算畀到個安慰佢。」
至於中午羅霖則以Deep V透視連身裙現身簽名會，獲逾半百粉絲撐場，粉絲不時高呼「Candy（羅霖）好靚女！超靚女！」羅霖稱寫真銷量厲害，更擔心印唔切：「除咗廣州，仲會發布去全世界。」她笑謂現時全世界也知她年屆50，頗感壓力，原想拍畢寫真後放縱自己吃零食，但現時要努力保持身形：「因為仲要宣傳本書，好似代表香港同世界各地女仔相比咁，似再參加選美。（會唔會搞巡迴簽名會？）有機會，下星期會先去廣州，內地都有3至4個站，仲有其他地方。」
為兒子做榜樣
現成為國際紅人的羅霖坦言，沒有信心衝入荷里活，又指兒子也有留意外國對她的報道，並以她為傲：「為佢哋做咗個榜樣，我一把年紀都有奇迹發生，真係咩奇迹都會發生，證明夢想係可以實現。」
文：名人組
|
鍾意就快D Share啦！
|
|
|
