相關連結：
【城市打游擊】神秘耆英私P》唱K半百阿嬸熟客：深水埗有十零間私竇 好多仔溝我
http://bit.ly/29AblSc「世間事不知怎分對錯，懶得問恩怨………..。」咦，咁多uncle 同auntie喺度唱歌飲酒嘅，乜嘢地方嚟㗎？呢度唔係Neway，亦唔係酒吧，而係深水埗一間家庭式神秘私竇。有人同《壹》仔講，深水埗有唔少呢類私竇，成為中坑同師奶嘅蒲點。有乜玩？唱歌飲酒兼互溝囉。不過，呢種場唔係咁易去，一定要熟人介紹先得。點解？因為佢哋無酒牌，所以一般只做熟客生意。上星期六，《壹》仔透過有關人士，認識咗私竇女熟客Angel。Angel就帶咗《壹》仔去到長沙灣同南昌街交界一間私竇，門口招牌寫住「容容金曲康藝社」，好鬼馬喎。入到去，先俾入場費，男士一百女士免費，無限時間任玩。雖然有熟客Angel帶住，但主持人仲對《壹》仔好有戒心，好驚警察放蛇，除了不時上下打量，仲叫《壹》仔自己落街買啤酒。其他客人佢就照賣，一百二十蚊半打，平過酒吧。呢間場大概五百多呎，分大廳同房間。大廳霓虹燈光，好似色情架步，通常劈酒都會喺大廳。而房間就用來唱K，當時已經有十多名中年阿叔同年過四十既師奶喺度唱歌。有個阿伯應該已經年過七十，估唔到仲咁有興緻。嚟得呢度玩嘅客人，好多都係想溝仔溝女。同後生仔女冇分別。《壹》仔就見到，一班阿叔唱歌時，都會攬住略胖師奶客人含情脈脈咁唱埋晒80年代嘅歌，好似林子祥劉天蘭《三人行》。女客人亦好enjoy，好Sweet Sweet呀。《壹》仔曾查詢酒牌局，證實呢間私竇的確未有申領酒牌。其實除咗負責人犯法，嚟呢度玩嘅客人，向未有領有酒牌嘅場所購買酒類，或面臨票控及罰款。撰文：程志康
攝影：田俊 金文
|
鍾意就快D Share啦！
|
|
|
