無綫棒打鴛鴦 放生「鵬欣」奉旨拍拖
無綫花旦小生昨日傾巢而出，齊集灣仔會展出席影視展，戀火正旺的無綫情侶洪永城唐詩詠、蕭正楠黃翠如以及緋聞情侶馬國明黃心穎等在活動上撞到正，但卻被「隔離」，他們更少有地拒絕合照及訪問！反之降呢為「螢幕情侶」的陳展鵬、胡定欣，為了谷劇得以「放生」，「拍住拖」受訪。
無綫昨日派出逾七十位藝員包括黎耀祥、田蕊妮、陳豪、陳展鵬、胡定欣、馬國明、黃心穎、洪永城、唐詩詠、蕭正楠、黃翠如、岑麗香、劉佩玥及馮盈盈等到「香港國際影視展 （Filmart）2017」出席《TVB金禧戲劇綜藝強勢登場》活動。花旦均盛裝上陣，其中小花蔡思貝、唐詩詠齊齊晒玉背做「影後」，應屆港姐季軍陳雅思穿上白色低胸裝烏身晒「事業線」，成功搶鏡。
馬國明撇 黃心穎尷尬
一眾無綫情侶洪永城唐詩詠、蕭正楠黃翠如，以及緋聞情侶馬國明黃心穎同場撞到正，但他們卻遭棒打鴛鴦被「隔離」，大合照時企得離行離列，大會還拒絕一雙一對合照及訪問。唯獨展鵬與定欣這對降呢「螢幕情侶」，因要谷新劇《同盟》能合體拍照，定欣自薦拍旅遊節目，展鵬願意同行並笑說：「佢想去邊我就去邊」奉旨打情罵俏。
馬國明和心穎這對卻被「隔離」，男的完成儀式後更速逃，僅心穎單獨受訪，她否認對方逃避訪問及合照：「佢趕住返去開廠。（介意一齊訪問同合照？）點解要介意？（發展成點？）出過一次街，但唔係咩發展中，係朋友，相處了解中，進度係好慢o架。（幾時再進一步？）冇喎，角色上就有進展，你哋搞到我好熱、好尷尬！」
至於洪永城就為了唐詩詠而語塞，當他宣傳節目《退休地圖》時取笑黎耀祥：「公司叫我拍退休節目，我懷疑係咪得罪公司，原來係幫你搵嘅！」事後更得戚指哈薩克多靚女，卻被司儀陳芷菁取笑說：「係想測試你定力，大家都好關心唐詩詠！一講起唐詩詠，你就冇咩嘢講喇，係咪？」令他即時語塞。問唐詩詠是否已變成他的「死穴」，洪永城笑說：「我想保護佢多啲，佢經常話我亂講嘢，所以都係謹慎啲好，都想低調啲。（迴避與女友一齊受訪？）我哋經常一齊做訪問，可能溝通上問題，一定係我撞聾聽唔到，大家鞭策我」
咀傅嘉莉 毋須特別備案
洪永城又指與黃翠如在新劇《我瞞結婚了》拍咀戲不用備案，還想相約女友、翠如和蕭正楠一起看劇集：「輕輕一咀啫，唔使啦，佢唔會介意。（兩Pair人一齊睇親熱戲咁變態？）大家都諗多咗，我同傅嘉莉條線會仲激啲。（同女友備案？）有輕輕提過，大家都係演員，唔會介意。」
唐詩詠則笑言不介意男友與翠如在劇中激咀：「唔會眼火爆，我覺得應該再激啲，佢哋咁熟，咀好小事啫，我拍戲都有。」心情靚爆的她被問到與男友感情回復穩定？她說：「一向都差唔多，只係希望少提感情事。」
文：影視組
|
鍾意就快D Share啦！
|
|
|
