賭王何鴻燊四房公子何猷君o依家喺上海創業，噚晚佢喺微博留言表達對香港航空不滿，提到朋友漏咗護照係機艙入面，搞到去到上海浦東機場入唔到境。猷君多次打去航空公司求助，由噚日凌晨1點幾打到朝早8點，有圖為證；猷君提到對方態度好差，而且等咗成晚都話搵唔到，佢同朋友喺機場嘅長凳瞓天光。最後，有職員認到佢係賭王個仔，用咗10分鐘就即刻搵番。《蘋果》搵咗猷君問過咩事，佢表示：「點解要寫呢件事出嚟，因為無啦啦喺機場，陪我朋友瞓咗7個鐘，留咗成晚。件事因為我朋友漏咗passport喺飛機度，即刻同佢哋(職員)講，因為我哋唔可以自己上飛機搵，航空公司話幫我哋搵，搵完話畀我知。點知搵咗又好，冇搵又好，佢哋都冇同番邊境人員、過關保安局班人講。我哋冇消息，佢哋又冇消息，保安局人員陪我哋捱夜。等到終於有人肯聽電話，嗰時係5點幾、6點，佢話check唔到，要等人返工，要一、兩個鐘。」猷君繼續話：「到7點15分，打嚟話check到噚晚清潔嗰班人，佢哋話搵唔到passport。我同朋友都嬲，搵唔到又唔講，至少我同朋友可以住酒店，我朋友都要(用護照)返香港。我再打電話問佢哋可唔可以搵多次，佢哋支吾以對，好似唔係咁想搵。跟住嗰時7點半，有人返工，有個香港航空女仔認得我，叫人快啲搵，『佢係何生個仔』，睇住個女人打電話，10分鐘後即刻搵到，搵番出嚟，我咪覺得有問題，應該係一視同仁，唔係我係何生個仔，就即刻搵到。」
|
鍾意就快D Share啦！
|
|
|
