小心身體呀！
上年香港小姐選舉，當時身材出眾加上有甜美樣子嘅蘇韻姿（Andrea）瞬即成為熱話候選人之一，喺日本拍外景時，烏身打沙排「胸湧」上圍盡現一幕更加令人印象深刻。雖然最後止得第四名，不過Andrea喺娛圈發展都幾順利，依家佢就拍緊無綫處境劇《愛．回家之開心速遞》飾演「紅衫魚」一角，之後嘅《老表，畢業喇！》都有份演出。
近期喺《開心速遞》中發現Andrea右頸近顎骨位置生咗個乒乓波咁大嘅瘤，情況仲好似愈嚟愈嚴重，隔幾集仲好似又大咗咁。就此事向Andrea查詢，她直認腫瘤愈嚟愈大，仲同無綫攞咗兩星期假去做手術：「之前選美時已經有，開頭以為唔夠瞓壓力大，所以淋巴腫咗好普通，點知選完之後都仲有，不過唔係好嚴重就冇太留意，之後突然大得好快，當時好擔心即刻搵醫生check，醫生都建議我做手術，同公司傾過，配合到有兩星期假已經去咗做手術，切除驗過冇問題。」
經歷過呢次腫瘤事件之後，Andrea表示好多謝身邊人同家人嘅關心：「同事、身邊朋友好take care我，同屆港姐港男都好關心我好錫我，媽咪仲飛咗嚟香港照顧我，依家手術好順利，冇晒事」
來源 source: http://hk.on.cc
|
鍾意就快D Share啦！
|
|
|
