2019年5月24日 星期五

【無綫御用強姦犯】李天翔轉行做健身教練 最深刻對手係唐詩詠:姦淫擄掠我乜都得 __,唐詩詠,李天翔,無綫,

馬上成為壹會員會員專區只限會員閱讀會員註冊/登入《蓋世寶訪問你》今集找來入行24年的李天翔做嘉賓,今年5月滿約無綫嘅佢決定離巢。蓋世寶問李天翔,記唔記 ...


馬上成為壹會員
會員專區 只限會員閱讀


《蓋世寶訪問你》今集找來入行24年的李天翔做嘉賓,今年5月滿約無綫嘅佢決定離巢。

蓋世寶問李天翔,記唔記得第一套劇係咩,又問佢角色有冇發揮,他說:「第一套係《英雄刀少年》,吳卓羲、黃宗澤主演。其實係呢套劇奠定咗我嘅反派角色,我喺劇中飾演大反派,當時無強姦戲份,第一次嘅熒幕初吻畀咗唐寧,雖然無強姦戲份,但都係反派角色。真係因為嗰一套劇,奠定咗我嘅成魔之路。」入行多年,李天翔做得最多就是反派角色,他說:「第一套劇奠定咗我嘅反派角色,我真係要多謝黃偉聲監製,因為呢套劇係佢搵我做嘅。之後開始有其他監製,搵我演同一類型角色。」感受如何?有冇諗過點解自己唔可以演好人角色呢?天翔說:「我從來無諗過喎,我到而家仍然覺得,好人角色無咩發揮,同埋好難演。同埋壞人發揮空間比較大,其實點樣演都可以,我鍾意創作,所以到呢一刻你問我,我都好享受飾演反派。」享受做反派,定係享受做強姦犯?他說:「真係無乜所謂,姦淫擄掠我乜都得。」強姦過幾多女演員,有冇數過?天翔數數手指說:「我無數過,亦都唔清楚呢個稱號幾時開始。」

外界對李天翔冠以「無綫御用強姦犯」,他自己又點睇呢個朵呢?「呢個稱號幾時開始我真係唔知,可能喺觀眾眼光裡面係數得出嘅,入行咁耐都唔記得自己拍咗幾多套劇,但係真真正正飾演好人嘅劇,我諗唔超過五套,所以應該係潛移默化,觀眾就會覺得呢個演員又係做呢啲角色,到下一套又係做呢個角色,所以無形中就有咗呢個稱號。」有這麼多次強姦及非禮拍攝經驗,有冇邊次係特別難忘?他說:「真係無咩最難忘,如果你話比較辛苦嘅,應該係唐詩詠,因為我同佢拍《鐵馬尋橋》時,講述我喺山頭追住佢,然後又要撲過去再碌草叢,嗰場戲的確好辛苦。」會否拍上癮?他笑說:「梗係無上癮啦,拍呢啲場面基本上大家都唔會有咩反應,因為某程度上都抱住一個好緊謹同緊張去拍呢啲戲,其實大家都唔會有任何感覺。」

蓋世寶指曾有一段時間,發覺李天翔有好多好好嘅角色,除咗嗰啲強姦犯之外,已經榮升第三男主角,每個角色都好有發揮,天翔說:「真係托賴,要多謝所有用過我嘅監製,佢哋信任我,每套劇都搵我去做。但你話級數係咪唔同咗,我其實無諗呢樣嘢,因為可能我經歷過,譬如呢一套有個好重戲份嘅角色俾你去演,下一套可能降番落嚟做同事甲乙,我曾經試過,所以經過呢啲經驗之後,話俾我知唔好去諗任何嘢。」角色開始有發揮,演技又被肯定,突然又好似消失咗,呢段期間天翔發生咩嘢事?係咪就係佢離開TVB嘅真正原因?他說:「我又唔係突然間無晒所有嘢,因為之前轉咗兼職合約,都係我自己要求嘅,因為我想自由度大啲。對於一間公司嚟講,我又會覺得係正常嘅,作為一間公司老闆,有全職嘅點解唔用呢?當然先用全職員工啦,點解要用一個兼職員工?所以工作量少咗我覺得正常嘅,但奈何轉咗合約之後,都係嗰一句,真係要多謝一班監製,因為佢哋都肯搵我拍劇,基本上工作量無好大變化。」是心淡嗎?「如果話無就係呃你啦,唔多唔少一定有,因為自己做咗咁多年,而成績唔係話無,但奈何作為一間公司,我覺得少少獎勵或者安慰都無,所以呢方面會心淡,有少部分因為咁而導致我選擇離開。」

離開工作了24年的地方,會有其他原因嗎?他說:「實則情況係自己年紀開始大,其實今次公司都有搵我續約,但又係我自己決定離開嘅,最主要原因係年紀大,公司想同我續約三年,自己計過數,如果再過多三年,有成績就話好啫,如果唔好嘅話,到時候離開呢一行嘗試轉工,外邊公司啲老闆又會諗,我請個廿幾歲嘅返嚟好過啦,點解要請個四、五十歲嘅人嚟做嘅?所以我係為咗自己年齡著想,今年就決定離開,嘗試出去博一博。」有不捨嗎?「唔捨得啲梳化服同事。其實今次解約之後,感覺輕鬆咗,始終一間公司就好似一間學校,有好多規矩,我嘅心態係作為一個演員,淨係負責演戲,演好每一齣戲就已經足夠,至於其他嘢,我覺得唔需要去管。因為公司就好似一間學校,譬如言行舉止各方面都監管,我覺得會有無形中嘅壓力,雖然我私底下唔係去打家劫舍。所以今次心態係輕鬆咗。」已離開無綫的天翔,可有什麼計劃?「無計劃,啲人其實覺得我好大膽,真係無計劃。有啲人覺得我好大膽,因為個個都以為你離開,就一定有後路、後著。真係無,離開嘅原因真係關乎年紀問題,因為我真係驚,始終而家結咗婚,雖然無小朋友,但作為一位男性都要負責照顧屋企。真係因為年齡而令我決心嘗試離開。因為始終真係驚,過多幾年先至離開,到時好難搵工作。所以不如早少少離開,俾自己一、兩年時間出去博一博,得就得,唔得就真係要轉工,唔好浪費時間。始終有個責任,唔再係單身寡仔。」有沒有諗過轉咩嘢工作?他說:「都無喎,坦白講,你問我我當然想做番呢一行,我唔係叻,但始終做咗咁多年都有一定經驗,而其他嘢又唔係好熟,又唔係好識。而家離開TVB,暫時未有嘢拍嘅時候,好好彩有個朋友開健身中心,自己又鍾意玩,而家就嘗試轉做健身教練。」暫時會向健身方面發展?「係呀,因為自己都鍾意健身,既然有咁嘅機會咪去試一試囉。除咗幕前工作,都希望嘗試其他嘢嘅,因為幕前工作唔穩定,唔係今日有工作,聽日都一定有工作嘛,所以都要多方面嘗試。」

策劃:肥A 攝錄:王志明、蕭敬漁

蓋世寶化妝及髮型:毛毛(嫁妝)

立即下載APP,精彩內容壹手掌握

下載連結:http://bit.ly/Next29App

如對會員訂閱制遇到任何問題或意見,你可以致電 2623 9985,或電郵聯絡客戶服務主任cs@nextdigital.com.hk,我們定當盡力協助!


鍾意就快D Share啦!
Related Posts Plugin for WordPress, Blogger...