留長髮黐 band友 變靚王菀之回春

FBI

留長髮黐 band友　變靚王菀之回春

33歲王菀之（ Ivana）今年真係大豐收，年頭一首〈留白〉橫掃頒獎禮，處女拍劇《老表，你好嘢》，飾演癡情晴晴又個個讚。早排先受過情傷嘅 Ivana，唔只自爆大把人追，仲傳出同 band仔「觸執毛」成員，廿多歲嘅 Mike搞姊弟戀。有愛情滋潤，唔只成個人 refresh曬，連所識嘅朋友都後生埋。

上週一（ 15日）晚， FBI喺灣仔撞到 Ivana，當晚佢同埋班𡃁界音樂人，好似同陳淑莊傳過緋聞嘅填詞人梁柏堅等一齊去睇加拿大 post-rock band「 Godspeed You！ Black Emperor」迷你演唱會。完騷後， Ivana仲吹雞去會場附近嘅麵鋪食宵夜。 FBI見以前陰聲細氣斯斯文文嘅 Ivana，嗰晚對住班𡃁界音樂人，即時放開矜持，唔只不停「𢱑水吹」，食麵時仲大啖大啖食，成個人唔同曬。

楊千嬅影後自爆《志明與春嬌》執二攤，原來正選係 Ivana！𠵱家現實中 Ivana亦好似春嬌咁搞姊弟戀，仲搞到回曬春，如果佢冇推戲， FBI買佢一定做得好過阿丁太囉！

有愛情滋潤係特別唔同，上週四（ 18日）王菀之出席植村秀活動時，唔只身形飽滿咗，仲對住鏡頭嘟曬嘴，全場春風滿面。

早前《 FACE》報道過觸執毛結他手 Mike，向 Ivana強勢追求，雖然 Ivana唔肯認，但就笑住話：「可能今年犯桃花，講講吓會變真都唔定。」 FBI聽聞佢兩個近排仲成日去藝穗會飲酒談心喎！

大啖食

同一班 band友去食宵夜， Ivana即放下中女矜持，不斷大大啖咁狂吞牛腩麵同油菜。

狂煲粥

食完宵夜， Ivana即攞起電話狂煲，話唔定係同新男友報到。

近期 Ivana亦特別愛扮靚，竟然喺微博大曬長髮靚樣同一雙修長靚腳，但就因撞正四川地震俾人話「愛靚唔愛國」，無辜！網上圖片

前週五（ 12日），觸執毛喺九展開騷， Ivana亦有份做嘉賓上台唱歌，仲唔避忌放上微博，擺明撐男友。網上圖片

撰文、攝影： FBI

電話報料： 9106 2799

電郵報料： mailto:facenews@nextmedia.com

鍾意就快D Share啦！

下一篇 》