MastaMic正印監場 陳淑莊快閃喪食

FBI

MastaMic正印監場　陳淑莊快閃喪食

前立法會議員陳淑莊，上年因為同新晉 rapper MastaMic（馬米）合作一齊 rap咗首〈戴錯嘢夫人〉， 41歲陳淑莊同 27歲馬米相差 14年唔只冇代溝，仲傳佢哋擦出愛火花。

上週六（ 30日）馬米踩入九展開騷，陳淑莊當然要撐場，更上台一齊合唱撻着之作〈戴錯嘢夫人〉，仲俾林敏驄笑馬米「佔領中女」。不過當晚馬米任職藝穗會公關嘅正印女友 Kathy Chan全晚坐喺會場𥄫到實，所以陳淑莊都放低豪情，盡量同馬米保持距離，係咁意抱抱就算。

馬米被正印女友人盯人，陳淑莊惟有閃人， FBI所見，當晚中途離場嘅陳淑莊未完騷先走落去會場樓下嘅「 7仔」買紅酒返入後台同班工作人員慶功，之後就同埋幾個 friend拉大隊去尖沙咀食宵夜，只見陳淑莊一到場就化悲憤為食慾，唔理儀態不斷狂食。食足 3粒鐘後，就同另一位傳過緋聞嘅填詞人梁栢堅孖住一齊走，睇嚟熟女陳淑莊都係唔愁冇仔陪喎！

喪食失儀

當晚陳淑莊去咗尖沙咀食豬骨煲，一食就食足 3粒鐘，埋單後見到有 friend食緊嘢，陳亦唔客氣用手攞人哋啲餸嚟食，仲食到好狼狽，冇曬儀態。

食完宵夜，陳淑莊就孖住另一緋聞男友梁栢堅再去附近酒吧繼續解悶，而上年本刊曾影到 2人一齊喺中環 ifc隊啤（小圖），好投契。

出蠱惑手

馬米喺九展開騷，緋聞女友陳淑莊亦被邀請做嘉賓， 2人一齊上台合唱〈戴錯嘢夫人〉，但因為馬米正印全場𥄫到實，陳同馬米一直企到離行離列，卻出隻蠱惑手拍吓馬米背脊。

僵硬抱抱

唱得興起時，陳主動走埋去馬米面前抱抱，而馬米雖然迎合雙手攬住，但面容就硬曬軚，似係好尷尬。

正印行先

最鍾意「佔領中女」嘅馬米，當晚其約 40歲嘅公關女友 Kathy亦高調到場宣示主權，而陳淑莊只好跟尾入場。

撰文、攝影： FBI

電話報料： 9106 2799

電郵報料： mailto:facenews@nextmedia.com

鍾意就快D Share啦！

下一篇 》