搭單慶祝
張栢芝在母親節正日要被迫玩失蹤，但原來在前一日，栢芝秘密帶兩個仔到油塘商場 j-plus樂園，參加蔡少芬大女楚兒生日會，順道為 Quintus慶祝。
滾熱辣
母親節拉姑霸兩孫 栢芝被迫提早慶祝
張栢芝去年五月正式跟謝霆鋒離婚，脫離謝家之後的她，擔正的電影全數仆直。事業插水，栢芝近一年幾乎全面停工，專職湊仔。
周日（ 12日），適逢母親節兼栢芝細仔 Quintus（謝振南）三歲生日，栢芝原定安排當日在寓所的 club house大搞生日派對，更打算邀請謝氏一家和一眾好友出席。可是埋門一腳，與栢芝屢傳不和的過氣奶奶拉姑，卻打對台表明會在同一日為愛孫搞生日。為免霆鋒左右做人難，栢芝局住提前一日（ 11日），帶兩個囝囝到油塘商場的 j-plus樂園慶祝。雖然在細仔正日生日那天被迫失蹤，但陪住兩個仔玩機動遊戲的栢芝，依然笑得開懷。
張栢芝雖然跟霆鋒分了手，但據知一直恨「翻頭嫁」的栢芝，今時今日仍盼望可以與前夫重修舊好，更借兩個仔過橋，炮製多次家庭聚會，望霆鋒回心轉意。就連霆鋒亦說：「依家我一有時間就會上栢芝屋企探兩個仔，煮吓嘢俾佢哋食，我同栢芝關係亦好咗好多。」
拉姑落令栢芝「消失」
正當眾人認為二人復合有望，周日（ 12日）母親節，亦是栢芝與霆鋒的細仔 Quintus三歲生日，霆鋒在家中開 P慶祝，席間更有拉姑、四哥和細妹婷婷，但身為母親節主角的栢芝，卻全程冇影。知情人透露：「栢芝鍾意熱鬧，每年兩個仔生日都會約朋友同屋企人大搞。原本今年都諗定喺自己屋企個 club house搞。佢之前問過霆鋒意見，霆鋒最初話冇所謂。點知隔咗幾日，佢就打俾栢芝話拉姑自己想搞，叫栢芝搵過第二日。拉姑咁講，擺明冇預栢芝啦，栢芝梗係㷫啦，不過佢唔想霆鋒難做，咪局住話冇問題囉！」
當日壽星仔 Quintus和哥哥 Lucas（謝振軒）在霆鋒家中玩足五粒鐘才返娘家。據知冇兩個仔在身邊的栢芝，則獨自留在家，乾等到晚上八點，才可以守尾門與兩個仔食飯慶祝。
屋邨樂園搭單慶祝
正日被迫消失，平時錫仔錫到燶的栢芝，原來在母親節正日前夕，秘密帶了兩個寶貝仔到油塘商場，美國冒險樂園旗下的 j-plus樂園，參加蔡少芬大女楚兒兩歲生日會，順道為細仔慶生。知情人透露：「其實栢芝同 Ada（蔡少芬）本身唔熟，反而上年返內地拍《極速天使》嗰陣，就同做武指嘅張晉熟咗。之後兩家人都試過 house warming， Quintus同楚兒仲 friend埋㖭！上個禮拜六（ 11日），楚兒生日， Ada請咗圈中幾個 friend好似鄺文珣同姚瑩瑩出席，佢哋都有請栢芝，不過冇諗過佢真係會到！」
現場所見，雖然只是為他人慶生，但高調慣的栢芝，十足主人家一樣滿場飛，與其他賓客打招呼吹水。其間記者聽到她說：「 Quintus都係金牛座，佢聽日三歲生日呀！」栢芝與賓客打牙骹期間， Quintus忽然扭計要玩機動遊戲，栢芝即指着他訓話幾句。不過口硬心軟的她，隨即動身帶兩個仔去玩機動遊戲。由於每個參加生日派對的小朋友，都可以得到一張有 40點積分的遊戲卡，用來玩各種機動遊戲。當 Lucas玩曬卡中的積分時，即大聲嚷着要媽咪再買金幣，栢芝見他玩得開心，便再換了一百蚊金幣，但就對 Lucas講到明：「嗱！玩完就算，冇得再扭計， OK？」母子三人玩了接近兩小時才捨得離開。
罕有妥協俾面霆鋒
今次栢芝罕有肯妥協，讓出母親節和 Quintus生日正日給前夫一家，全因睇在霆鋒面上。事關栢芝深知苦心經營的和諧關係得來不易，因此，即使拉姑今次硬搶正日母親節，栢芝亦只好逆來順受。日前其內地經埋人公司負責人張先生表示：「其實對栢芝來說，每一日都是母親節，亦都是兒子的生日，所以她就讓 Quintus去陪爸爸和嫲嫲一起過生日和母親節。栢芝是個樂觀的人，她覺得兒子能陪伴爸爸和嫲嫲，他們一定很開心。」至於拉姑，本刊至截稿前仍未獲回覆。
遊艇會家庭樂
霆鋒和栢芝正式離婚已一年，但其間屢傳二人復合。去年九月，二人被拍得同在深灣遊艇會家庭樂。着上三點式的栢芝，更疑似繑實霆鋒。
離婚各有各
去年五月，霆鋒和栢芝正式離婚，女方一筆過收了前夫八千萬生活費，雙方冇拖冇欠。但有指栢芝一直未死心，搵兩子 Lucas同 Quintus做說客，多次求謝霆鋒復合，重組幸福家庭。雖然屢傳復合，但其間雙方亦有不少緋聞，令復合一事疑幻似真。
百二蚊任玩
蔡少芬為愛女楚兒舉行的 2歲生日派對，場地位於油塘新商場大本營內的 j-plus樂園，場地可容納一百人。而生日派對限時個半鐘，入場費分繁忙及非繁忙時段。以周六計，每位小朋友加兩位成人，收$120，不包派對食物。每位出席的小朋友，均可得到一張有 40點的積分卡， 40點代表有 40個金幣，可以用作玩機動遊戲之用。至於波波池和咖啡杯則可無限次任玩。據知當日蔡少芬請了 20多位小朋友，加埋食物和布置，埋單一萬有找！
- 栢芝搭單為 Quintus慶祝生日
|
鍾意就快D Share啦！
|
|
|
