探熱針
陳山聰假分手扮折墮
陳山聰跟何超雲拍拖兩年多，上月開始上演分手連續劇，先有陳山聰發窮惡爆粗鬧女友招致四失，其後趁超雲抱恙飛英箍煲，被指箍煲失敗的他，上週六隻身飛返香港，打回原形住舊居，「四失」零收入要搵朋友打救。
據了解，原來小聰子飛英服侍超雲女王後，已死𦧲復合成功，不過火速被氹掂的超雲落唔到台，於是重新自編自導自演一幕假分手，何陳山聰接柯打，轉玩地下情扮折墮。
自編自導自演
上週六（五月四日），飛倫敦箍煲三星期的陳山聰回歸。到港當日，超雲校啱時間，開始鋪排假分手大龍鳳，先在 fb及微博公布單身劃清界線，將男友降級為好朋友，又公開叫大家「俾私人空間陳生」，攞彩兼攞分。為配合女友自編自導自演的分手煙幕，陳山聰一反常態唔再龜縮，跟超雲同遊葡萄牙後曬得一身古銅色的他，罕有企定定在機場接受訪問，澄清沒有欠大筆卡數，又再三強調「沒有講過結婚」。
一切照足超雲編排的劇情發展，喪失何家準女婿特權後，不再有車有司機接送出入，陳山聰借用朋友七人車，返回昔日未升呢時的九龍灣麗晶花園舊居，全程扮折墮。
去埋西班牙
據了解，陳山聰四月中飛倫敦箍煲成功，但食回頭草事件曝光後，一直在微博表現情傷的超雲即時冇曬面。
「佢介意外面嘅人點睇，之前有網民笑佢著衫唔掂扮潮人，佢都接受唔到，今次咁快就被人踢爆同番山聰一齊，佢驚俾人笑，所以先編咗呢個箍煲失敗嘅古仔出嚟。山聰冇所謂喎，咪當做戲咁做囉！身邊朋友都知佢哋復合之後去咗好多地方玩，除咗葡萄牙又去埋西班牙，全部係陽光海灘，兩個人仲係好好。」二人身邊朋友說。
翻撻後，二人本計劃五月二日一齊由倫敦返港，但為免再被影到相淪為笑柄，陳山聰改在五月三日離開，而超雲則延遲至五月七日起程，前後腳走人；據知陳山聰離開倫敦前，依然住在超雲豪宅，二人經常玩煮飯仔，女方又用專車送男友到機場，足證關係未變。
無奇不有
寧俾人知莫俾人見，娛樂圈情侶更加！不論拍拖、分手、復合、再分手、再復合，影到相都未必肯認！極盡騎呢！
長途賽
91年撻着的許志安、鄭秀文，共同經歷過不少風雨， 02年安仔得「最受歡迎男歌手」高調向女友發表「廚房宣言」，但兩年後分手。安仔之後另結新歡餘德琳（ Michelle）， 09年 Sammi病癒復出，二人復合之說甚囂塵上，安仔與 Michelle終於在 10年分手，未幾更被拍到與 Sammi在太平館撐枱腳，才公開承認復合。
拉鋸戰
唐詩詠與崔建邦 05年開始拍拖，男方多次被拍到夜蒲溝女，女方依然不離不棄，直至中巴混血兒鄺敏慧介入，唐詩詠才忍痛分手，之後崔建邦鬧出虐打鄺敏慧及無牌駕駛事件，唐詩詠又再出口力撐事業直插穀底的前度，兩人多次被拍到同車及返家照片，不過仍堅持沒有復合。
|
鍾意就快D Share啦！
|
|
|
