亞熱帶
彈唔起 木村拓哉
剛憑《無價人生》奪得「第 75回日劇學院賞」視帝的木村拓哉，在劇中又扮窮人又要除衫，出位搞作令他第九次成為視帝。不過風光背後充滿暗湧，皆因木村已經連續三套劇平均收視唔過 20%，加上唔少視迷大彈木村又殘又老，反映已經四十歲的「萬人迷」木村風光不再。
《無價人生》首集收視僅 16.9%，不但打破木村劇集首集必有 20%收視的神話，就算去到結局玩埋「劇集直播」，收視仍然不振，全劇平均收視只有 17.7%，與他在《律政英雄》的 33.9%平均收視相比，只剩一半。
連環三劇唔掂，有唔少視迷歸咎於 40歲木村又殘又老。其實，《無價人生》卡士唔差，有靚女香里奈、演技派中井貴一及《螢之光》男主角藤木直人。播出之前，木村都知人氣不及當年，惟有自爆同實力派演員荻原聖人不和：「初出道時，有人同我講：『你呢啲偶像派邊識做戲㗎！』我好嬲呢個人！（佢係邊個？）佢係荻原聖人！」 07年兩人在《華麗一族》，演一對好朋友都呃到人，同樣好演技！
之後，又輪到劇組爆出木村同香里奈戲假情真，搞到木村老婆工藤靜香頻頻探班，要宣示主權，不過一樣無助收視。
壓力爆煲，木村仲好衰唔衰，去年被揭原來曾兩次超速駕駛並被吊銷牌照。雖然每次罰款只是 3千幾港元，不過木村是豐田代言人，超速事件隨時影響續約。木村一個廣告價 keep住 400萬港元，仍然是最受歡迎廣告影星，不過就輸俾同是大和民族高爾夫球手石川遼（ 800萬港元）及棒球手鈴木一朗（ 640萬港元）一大截，認真丟架。
老態畢現
在《 Smap X Smap》，木村玩到除衫，可惜佢六嚿腹肌合成一嚿，呢鋪真係獻醜。細心睇，四十歲木村眼紋、面紋出曬嚟，認真趕客。
廣告價只排第三
為了挽回弱勢，木村已經應承首次拍古裝劇集。劇中他飾演織田信長，夥拍米倉涼子、北野武及小粟旬。不過套劇要下年至開拍，木村今年只能靠《無價人生》電影版吊住人氣，希望他到時 keep番靚仔至見人啦。
|
鍾意就快D Share啦！
|
|
|
