掃呢頁CODE去手機

2013年5月3日 星期五

高層照狂加戲 黃翠如騎住田蕊妮




佢鍾意笑𠱁得人!(真實對白)

在新劇跌落二線的田蕊妮,周一( 29日)在電視城接受訪問時,顯得十分無奈。

娛聞樂

高層照狂加戲 黃翠如騎住田蕊妮

朝中有人好辦事,去年有線主持黃翠如( Priscilla)、洪永城和陸浩明轉會無綫後,得前有線高層、現職無綫非戲劇製作總監餘詠珊撐腰,密密做到冇停手,最近更車輪轉霸住閒日晚上十點半的綜藝節目檔期,務求洗腦式轟炸觀眾。

當中以黃翠如跑得最快,套套劇擔正,最近她拍住好戲之人郭晉安、麥長青及田蕊妮合演清裝劇《舌劍上的公堂》。有高層照,黃翠如的戲份愈加愈重,甚至蓋過第一女主角田蕊妮。

對於升上第一女主角,黃翠如直言:「套劇我由頭帶到落尾,好有發揮。」而被踩住上的田蕊妮就酸溜溜說:「佢鍾意笑𠱁得人囉!唔會計較邊個係第一女主角,計嚟都冇用!」

監製幫我度身訂造!(真實對白)

對於騎住田蕊妮做女主角,黃翠如兜圈話:「套劇監製為我度身訂造呢個角色,好有發揮,而且我同個個演員都會有對手戲。」

入行 10年的有線主播黃翠如,去年 4月簽約成為無綫親生女後,揮低不少二線女藝員,接連在新劇《心路 GPS》和《師父•明白了》中孭飛,最近忙於拍攝金牌監製李艷芳的清裝劇《舌劍上的公堂》。據知黃翠如原先只是第二女主角,其戲份由中段才出現,但監製近日暗中狂加黃翠如的戲份,變相成一線女角,將田蕊妮燉落二線。

大塊田着火

據知,早已睇過劇本的田蕊妮,得悉監製忽然改動劇本,更發現自己有幾場戲遭刪剪後,感到極度不滿,曾試過踩上監製李艷芳的房中質問。李監製雖然多番安撫她,但由於是上頭 order,因此面對田蕊妮詐型,亦愛莫能助。

知情者透露:「 Sandy(餘詠珊)同珍姐(戲劇製作總監曾勵珍)一向有偈傾,加上珍姐知 Sandy係老闆陳國強心腹,所以珍姐都好識做,力 sell黃翠如俾監製,芳姐(監製李艷芳)早排就搵佢拍《心路 GPS》。雖然套劇收視一般(平均 26點收視),但佢今次再開《舌劍上的公堂》,都預咗個角色俾黃翠如。原本套劇由阿田(田蕊妮)同郭晉安孭飛,依家見黃翠如擔正,阿田梗係嬲到震,佢份人有嗰句講嗰句,其實佢都試過搵芳姐傾咗幾次,不過大石壓死蟹,就算講多幾多次都冇用。」

我好念舊!(設計對白)

陳志雲去年離職後,餘詠珊接管綜藝科。為鞏固地位,她安插不少有線親信入無綫。黃翠如、洪永城及陸浩明 3位前主播,更可升呢拍劇兼做主持。

高層照住

餘詠珊與老闆殼王陳國強曾在無綫收費電視共事,殼王去年更主動找對方接管綜藝科。老闆親自揀蟀,因此連戲劇分部的監製,都要俾餘詠珊幾分薄面。

黃翠如:監製幫我度身訂造

對於監製暗中加戲,黃翠如笑笑口回應:「只可以講我同劇中個個都有對手戲,會由頭帶到落尾。我個角色係大喊包。監製話個角色係為我度身訂造。( Sandy好錫你,知佢幫你加重套劇戲份?)我真係好多謝佢,俾咗好多機會我。嚟緊我都好忙,會再拍一套時裝劇。(知道田蕊妮好不滿喎。)唔會嘅,我哋各有各做,大家都有發揮。」

至於輸家田蕊妮就話:「我係咪第一女主角?我唔會計較邊個係囉!計嚟都冇用。(會唔會覺得黃翠如搶咗你飯碗?)如果我唔掂,唔使佢搶,我都冇得做。我唔覺佢係威脅!(你覺得佢份人點?)佢鍾意笑𠱁得人囉!」

冇交流

黃翠如和田蕊妮在片場鮮有交流。日前在同劇演員王君馨的微博,即使兩女同場,卻沒有影合照。

分唔勻

在新劇《舌劍上的公堂》,原本由郭晉安和田蕊妮孭飛,但經監製將劇本大幅改動後,不單田蕊妮遭刪戲份,連帶與她飾演情侶的郭晉安,亦難逃 cut戲份命運。反而益了與黃翠如有不少對手戲的麥包。

帶挈愛將

餘詠珊接管綜藝科後,大搞噱頭新節目之餘,還安插有線舊將做主持,繼續力捧自己人。

即將推出:《走過浮華大地》第二輯

洪永城在微博拉客,表示《走》若然收視有 20點就會開第二輯,不過據知無綫早有計劃開第二輯,更會移師亞洲國家拍攝。

熱播:《食平 D》

有線前主持肥媽和陸浩明,亦得餘詠珊射住,在無綫主持飲食節目《食平 D》。陸浩明下月更會獨自孭飛主持清談節目《 ROOM 6》,以採訪紅星為主。

播出無期:《最佳女主角》

由於陸浩明的新節目將於下月播出,為免同形式的節目打對台,據知黎芷珊的《最佳女主角》亦要押後播出。對此,黎芷珊表示:「我拍咗一半㗎啦,但都唔知幾時會播,你哋問番公司啦!」



鍾意就快D Share啦!