掃呢頁CODE去手機

2013年5月24日 星期五

為𢱑銀缺席新城節目 阿 Bob辣㷫薛家燕




娛聞樂

為𢱑銀缺席新城節目 阿 Bob辣㷫薛家燕

圓口圓面的阿 Bob(林盛斌),憑劇集《老表,你好嘢!》入屋,火速成為師奶新寵。早前他在李思捷節目《玩嘢王》被整蠱,因為識執生,又獲好評。

當旺阿 Bob搵銀大過天,除了拍劇做主持外,又客串電影、司儀及商演。不過就因為狂搵外快,而忽略電台節目主持這份工。

據知阿 Bob最近不時缺席由他與薛家燕主持的新城電台節目《開心家天下》,由原本一星期開咪五日,減至兩日,惟有搵老友司徒瑞祈做長期替工,就連家燕姐都不禁說:「佢依家搵到錢啦,又換樓又換 Benz。」火藥味濃。

現年 33歲的阿 Bob育有兩女兒,由於一家人經常「出鏡」,建立了阿 Bob好爸爸的形象,而且早前《老表,你好嘢!》叫好叫座,加上被《玩嘢王》大整蠱,愈整愈紅,接司儀 job都接到手軟。

此情不再

《老表》未出街時,阿 Bob有份主持《開心家天下》,與家燕姐仲有偈傾。做節目時會開心合照放上微博,現在此情不再。

台長朱明銳直言:「阿 Bob有時一個星期幾日都返唔到嚟做節目,阿水頂替當實習啦,公司淨係俾番好少車馬費佢咋!」

搵司徒瑞祈頂替

阿水對於做義工 DJ,他說:「我好鍾意做 DJ㗎!冇錢冇所謂,最緊要佢哋肯俾機會我。」果然抵得諗。

阿 Bob現時忙住拍無綫新劇《食為奴》及《 MY盛 LADY》,亦要抽時間客串電影《溝女不離三兄弟》,加上其他商場騷和私下接的婚宴晚宴等主持,阿 Bob根本無時間返新城電台與家燕姐主持《開心家天下》,新城上下對此均有微言。

知情人士透露:「阿 Bob依家似藝員多過似 DJ。照計佢紅啲,公司應該開心,不過佢明顯少咗返嚟電台做主持,好似唔記得有呢份工咁。台長朱明銳都同節目監製傾過,呢兩個月都係搵阿水(司徒瑞祈)嚟頂替。但講主持經驗講執生能力,阿水點都唔及阿 Bob,拍檔家燕姐同節目監製黃思敏難免要遷就下。家燕姐都試過出聲話阿 Bob,話佢咪淨係掛住搵錢,要飲水思源。佢哋除咗做節目有偈傾之外,私底下都冇乜嘢講!」

家燕開分店 Bob冇影

冰封三尺,非一日之寒。周日( 19日)家燕姐經營的「家燕媽媽」跳舞學校開分校,新城電台同事和司徒瑞祈等人亦紛紛到賀,但阿 Bob就以工作為由,無出席之餘連花籃都冇個。事後家燕姐大女石祐珊亦在微博直指阿 Bob「掛住賺錢嚟唔到」,字裏行間頗有骨。

如願做 DJ

阿水可以間歇頂替阿 Bob與家燕姐主持節目,自然無限興奮。上星期更訪問《情越海岸線》演員陳展鵬及李綺雯,事後急急放上微博,阿水自言在過程中得到無限滿足感。

3月起頂替阿 Bob

其實司徒瑞祈自 3月中,已經做長期義工,但他似乎好享受。未正式接手頂替阿 Bob前,已急不及待放上與家燕姐、阿 Bob和監製黃思敏(左二)的四人合照,在微博公告天下。

家燕爆 Bob搵人笨

記者問到家燕姐,是否不滿阿 Bob搵司徒瑞祈頂替做節目。家燕姐語帶雙關回應:「阿 Bob係叻仔嚟,佢出面好多嘢搞,好多瓣數㗎。依家佢搵到錢啦,又換樓又換 Benz。阿水梗係冇阿 Bob咁醒啦,阿 Bob冇俾番錢佢㗎。俾着係我,唔俾錢人,至少都請人哋食飯吖!」家燕姐擺明寸阿 Bob搵司徒瑞祈笨。

阿 Bob:想搵多啲

阿 Bob亦透過電話回應本刊記者,他否認與家燕姐不和,但就承認冇俾替工錢阿水。「大家夾到咪得囉,我同家燕姐有共識,我拍完《食為奴》之後冇咁忙,就會返新城電台做足節目。依家搵阿水幫手,佢係冇收我錢……但係佢做 DJ好 enjoy呀!不過講到底要多謝 TVB同埋新城俾機會我,大家都知我有老婆同兩個女,梗係想搵多啲錢,令佢哋生活好啲,做爸爸係咁啦。」

雖然阿 Bob得到師奶歡心,但都要顧及人際關係,就算紅到曉飛,得罪家燕姐,都唔會有運行!

半年賺四百萬

阿 Bob憑住《老表》彈起,正式入侵師奶界,食住個勢工作量倍增,拍劇、商演主持等,不足半年已四百萬落袋,難怪阿 Bob買樓又換車,豬籠入水。

現時阿 Bob正趕拍無綫新劇《食為奴》。

3月,阿 Bob擔任英皇春茗晚宴司儀。

《蘋果日報》圖片

阿 Bob與友人在油麻地開設時裝潮舖。

八百萬買樓兼換車

阿 Bob成功建立好爸爸形象,原本與太太及兩女兒共住旺角七百呎單位,近日以七百萬購入另一過千呎單位,一層收租一層自住。上月他更以八十萬購買易手 Benz房車,排場十足。



鍾意就快D Share啦!