2013年6月5日 星期三

死對頭 周慧敏罷唱寶記騷 陳慧嫻惡霸 30分鐘 solo




寶記紀念騷約 2粒鐘,陳慧嫻霸咗半個鐘 solo,真係勁!上月寶記騷舉行記者會,剪了冬菇齊蔭騎呢頭嘅慧嫻,有左右護法護駕出場,一姐地位超然喎!

真面目

死對頭 周慧敏罷唱寶記騷 陳慧嫻惡霸 30分鐘 solo

陳慧嫻今年入行 30周年,獲環球唱片高層黃劍濤力邀加盟,打鑼打鼓重開寶麗金 label畀佢做一姐,簽下 3年合約,同時亦宣布於 8月舉行《寶麗金 Forever》演唱會。

這次紀念騷有譚詠麟、李克勤、關淑怡和王馨平等寶記舊臣,更聽聞會密斟徐小鳳同歌神學友參與,但偏偏少了玉女掌門人周慧敏。原來 18年前,兩人已經在寶麗金爭做一姐;今次寶記騷, 47歲陳慧嫻講明要有 30分鐘 solo爭做主角,宿敵周慧敏即時罷唱!

89年,陳慧嫻在事業高峰期宣布退出樂壇,到美國讀書,當年隻告別作《永遠是你的朋友》賣成 35萬張。可惜 95年回歸樂壇重返寶麗金,正值周慧敏受公司力捧,陳慧嫻備受冷落,傳聞當年兩人一起到外地工作,周慧敏坐頭等、陳慧嫻只被安排坐經濟艙,至此兩人開始不和,甚少同場出現,兩位前輩積怨 18年,原來至今依然「冇偈傾」。

據聞關淑怡都有串燒歌環節,但只有一 part十幾分鐘,一向唔爭嘢嘅關淑怡一於少理。

仲有幾位寶記舊歌手未 confirm現身,周慧敏又罷唱,演唱會 poster出現兩個譚校長和 B哥哥,要計埋溫拿湊數。

積怨 18年

《城市周刊》圖片

95年從美國返港再戰樂壇,點知返到寶記面目全非,周慧敏憑玉女形象上位,一班年青偶像又湧現,當時陳慧嫻真係冇碇企。

搶位獨唱反枱

寶記歌手不時搞聚會,上年飯局,連關淑怡都畀面出席,但咁多年來,有周慧敏就冇陳慧嫻。

近年唱片市道慘淡,陳慧嫻先後幾次離開樂壇, 00年更曾患上焦慮症;退隱兩年,今年又再復出,眼見近年不少老牌歌手開騷,環球當然睇中陳慧嫻一堆經典舊歌,好似〈千千闕歌〉、〈飄雪〉、〈紅茶館〉都好受歡迎,仲特別重開寶麗金 label,讓她再做一姐;同時, 8月舉行寶麗金群星演唱會,表面上是紀念騷,但實際是幫陳慧嫻造勢。

知情人士說︰「原本今年幫陳慧嫻搞入行 30周年演唱會,但紅館冇曬期,環球驚唔夠時間宣傳賣飛,又驚陳慧嫻未 ready,惟有臨時 book會展期做紀念騷群星拱照佢,阿倫同克勤都冇所謂,最初 V記(周慧敏)都話 ok,但後來知道慧嫻會 solo 30分鐘之後,梗係唔制,所以之後 poster都唔見咗 V記張大頭相,大家都知佢唔想同陳慧嫻同台。」

舞台升降都要管

其實, 45歲周慧敏一向唔憂做,近年更只會選擇性工作,在國內亦有不少登台騷,又有廣告,賺錢 easy job,當然唔想幫死敵「抬轎」大合唱!而據知陳慧嫻重返老家做一姐亦條件多多,除了要自組新碟班底外,亦要指定形象指導;而紀念騷亦要求有 30分鐘的 solo時段,連舞台升降亦要管埋一份,據聞搞到演唱會導演 Jacky好頭痛。

對於周慧敏罷唱,環球助理總經理譚先生表示︰「好多寶麗金歌手都有搵,周慧敏係其中之一,不過佢回覆咗個期係做唔到!(但當初有影到 poster喎?)冇聽過。」

07年開始,陳慧嫻只係開騷唔出碟,靠內地走埠賺錢,環球睇中時機,重開寶麗金 label幫陳慧嫻搞騷,巡迴一定賺。《蘋果日報》圖片

環球高層黃劍濤(右一)承諾以寶麗金名義,陳慧嫻才肯簽約,口講否認做一姐,但陳慧嫻當然想爭番口氣。

唔憂做嘅周慧敏,得閒出席活動、登台唱幾首歌已賺唔少,拒絕為陳慧嫻造勢復出。

《蘋果日報》圖片

周慧敏在寶麗金有唔少金曲,雙方關係一直良好,王敏慧接手做經理人之後,周慧敏仍有舉行巡迴騷,但今次卻以撞期為由拒唱。圖片

落難天後

95年,陳慧嫻重返樂壇,但當時偶像歌手湧現,《我不寂寞》和《心滿意足》兩張唱片都叫好不叫座,到 03年推出的《情意結》,反應更冷淡,銷量只得 8千,令陳慧嫻大受打擊,因壓力問題患上焦慮症,之後陳不時在公開場合表現失常。

《蘋果日報》圖片

04年暴肥

《情意結》唱片宣傳之後,陳慧嫻就開始失蹤,直至擔任關心妍演唱會嘉賓時,身形肥了一個圈,當年更傳有身孕;直至 7月到廣州登台,在台上拉高上衣露出肚皮疾呼︰「我冇 BB!」

圖片

06年情傷

02年因腸胃炎入院,重遇多年沒有聯絡的謝國麟醫生,男方即展開追求,兩人開始熱戀。但 06年,謝國麟被雜誌拍得與一名女子在酒店態度親熱,曾經在感情兩度受傷的陳慧嫻再受打擊。

08年趴地

08年與醫生男友分手之後,陳慧嫻簽約國際娛樂有限公司,宣布再戰樂壇,同年 2月舉行了兩場《陳慧嫻活出生命 II演唱會》,期間情緒極度高漲,又瞓地、又趴地、又 fing頭,行為古怪。



鍾意就快D Share啦!
Related Posts Plugin for WordPress, Blogger...