走為上着 錫曬嘉欣 BB 江若琳嬲爆解約

江若琳現身在深圳拍攝兩套大陸劇《愛閃亮》及《待嫁十年》，出碟一事起碼要到出年先成事。

真面目

走為上着　錫曬嘉欣 BB　江若琳嬲爆解約

原本都算人強馬壯嘅星煥唱片，有一姐謝安琪、鍾嘉欣、江若琳同許廷鏗等，不過揸弗人何哲圖（ Herman）偏愛嘉欣 BB，將大部分資源畀曬愛將，冷落其他歌手，搞到歌手大逃亡！

繼關心妍、農夫和陳法拉先後離開，最近連江若琳都頂唔住，主動提早解約。加盟星煥差唔到兩年嘅江若琳，只係出過一隻碟同兩個簽名會咁大把，上年頒獎禮又幾乎捧蛋，搞到江若琳經理人兼寰宇老闆林小明嬲到震，就算江若琳仲有一年約，都寧願賠錢走人。

25歲江若琳近年專攻影、視，上年《高舉．愛》衝擊影後，今年就狂拍大陸劇，但其實一直想喺樂壇有首代表作，所以 11年簽約星煥，希望藉着揸弗人何哲圖喺無綫嘅人脈，幫自己一把，據聞當時寰宇老闆林小明，跟星煥各投資 150萬，幫江若琳造勢。

何哲圖最寵愛鍾嘉欣， 08年新城頒獎禮慶功宴上，嘉欣亦被拍得與何哲圖抱抱慶祝。《忽然 1周》圖片

11年江若琳簽約星煥國際，簽約 3年，當日老闆林小明亦有現身撐場支持。《蘋果日報》圖片

出咗碟冇人知

11年江若琳簽約星煥時，開曬記者會宣布，可惜雷聲大雨點小，兩年嚟只出過一隻廣東碟《天空之樹》，之後舉行過 2次簽名會，不過宣傳不足，銷量強差人意。

一心靠無綫幫手嘅江若琳，只被安排上《勁歌》及《明愛暖萬心》呢啲冇錢騷；反觀何哲圖錫到燶嘅鍾嘉欣，一年一碟，今年 11月又再出第三隻碟，何哲圖更公開承諾幫鍾嘉欣 9月開個唱，公司歌手梗係眼紅啦！不過，最令寰宇不滿嘅係，在四台頒獎禮上，江若琳近乎捧蛋收場，只在分豬肉的新城攞咗個「勁爆改編歌曲」，據知頒獎禮之後，林小明曾搵何哲圖「傾偈」。

捧愛將

嘉欣 BB係無綫親生女，加上何哲圖力穀，令嘉欣喺樂壇成績拍得住同門師姐謝安琪。

鍾嘉欣有何哲圖射住，每次簽名會都喺大型商場舉行，而且舉行次數又比江若琳多。

未加盟星煥前，江若琳由寰宇出碟， 07年至 11年分別出過 1隻廣東碟和國語碟，當年都賣到幾千張。

提前一年解約

雖然江若琳同星煥仲有一年合約，但據知寰宇寧願賠錢走人。知情者說︰「星煥都唔會穀 Elaine（江）㗎啦！嘥時間，不如早啲解約，搵過第二間唱片公司好過啦！」除咗江若琳，一哥許廷鏗、欣宜今年都滿約，如果星煥留唔住人，睇怕只可以專心做嘉欣 BB。

記者致電身在深圳拍劇嘅江若琳，對提早解約一事，她說:「係離開咗星煥，不過都算和平分開！(覺唔覺得公司偏心鍾嘉欣？）都唔覺，公司有自己嘅政策，做歌手好被動，都有其他唱片公司接觸，但嚟緊只會出國語碟。」

冷處理

江若琳出碟期間除咗有兩個簽名會外，都係出席吓《勁歌金曲》及無綫冇錢騷，宣傳明顯不足。

上年頒獎禮江若琳只在新城攞過改編歌曲獎，同林欣彤、張智成、陳思彤一齊分豬肉，其他頒獎禮全部捧蛋。

江若琳已離開星煥，而星煥網頁亦相當快手，即時將江若琳個名剷走。

專攻影視

江若琳唱歌事業未理想，反而影視就愈撈愈掂。上年同杜汶澤合作嘅《高舉•愛》提名今年金像獎「最佳女主角」，而大陸劇更連續接拍 3部，最近同吳卓羲忙拍《待嫁十年》，之後會到大馬宣傳新戲《結婚那件事之後》。

江若琳憑《高舉•愛》首度提名最佳女主角，雖然最後輸咗，但能夠同楊千嬅、周迅爭影後，好過攞新城豬肉獎啦！

江若琳現於深圳為大陸劇《待嫁十年》埋尾，劇中同吳卓羲談情。

早走早着

星煥原本歌手眾多，但隨着嘉欣 BB愈嚟愈得老闆寵幸，搞到其他歌手眼紅走人，現時有實力嘅除咗嘉欣 BB，就只有謝安琪，而年尾約滿嘅許廷鏗亦密謀轉會。

許廷鏗

今年底將會約滿，據知太陽娛樂嘅 Paco對佢好有興趣，好大機會轉會。

鄭欣宜

欣宜同何哲圖關係一般，宣傳亦明顯不及鍾嘉欣，故今年約滿之後亦好大機會唔留低。

陳法拉

10年簽約星煥，同年法拉不滿何哲圖力穀許廷鏗，而令她遲出碟。 12年法拉出碟，上《勁歌》宣傳，法拉 NG3次，原本導演收貨，但何哲圖即場要求錄第四次，明顯玩法拉，令法拉相當不滿，之後何哲圖表明不再為法拉出碟。

農夫

上年 8月農夫原本喺九展開個唱，但最後因銷情不理想而腰斬，即時辣㷫農夫，之後主動提早 1個月解約。

關心妍

10年簽約星煥，何哲圖未能為關心妍爭取紅館檔期搞個唱，最後關心妍提出解約，離開星煥。

鍾意就快D Share啦！

下一篇 》