半山競步
一向求瘦嘅 Sammi，喺寶雲道公園搏曬命競步，基本上無停低休息過，安仔就跑吓停吓，主要係陪女友囉！
媽咪姐
同居試婚 3個月 發福 Sammi夾實安仔陪跑
呢期媽咪姐真係有啲躁躁哋！天氣乾燥係原因之一啦，不過最大誘因就梗係政府唔發牌俾香港電視，阿梁特首竟然又死拖唔解釋發牌準則喎。所以呢，媽咪姐喺啱啱過咗呢個星期三（ 30日）就響應熄電視日呀！點都要表達無得轉台嘅不滿。
不過，講真吖，依家啲節目同劇集千篇一律，我哋一班 C9仔早就少睇。咁唔睇電視嗰陣，做乜好呢？媽咪姐咪上咗半山跑步，減吓肥之餘，順便抒發吓悶氣，仲俾我撞到「同居蜜友」鄭秀文（ Sammi）同許志安㖭！呢日見成個人圓咗嘅 Sammi，笠咗頂大太陽帽喺度競步，仲邊行邊 fing手，睇嚟係想 fing走啲 bye bye肉。而安仔呢，全程墮後，得閒先拉下筋，主力係睇住喺前面搏命喪走嘅女友！見佢哋兩個真係好有默契㗎，一個帶前，一個跟實，唔使回頭搵，亦唔會走失噃。睇嚟近呢 3個月嘅同居試婚生活係非常之咁順利！加上， Sammi喺《最佳女主角》訪問入面話以前無諗結婚，但依家就隨時嫁得：「無一個時間嘅約束，但我覺得絕對有呢個可行性。不過，結婚唔會通知，結婚之後再公開啦！」 Woo，仲唔係露曬口風等嫁？
查實喺朋友圈亦一早傳出佢哋會喺明年初秘密註冊，難怪 41歲嘅 Sammi猛話要快啲趕起新碟，原來有人生大事要排隊完成！
拎住樽水嘅 Sammi，步姿非常正宗，邊急步行邊 fing手，但身形明顯比今年 6月宣傳《盲探》時圓潤，幸福嘛。
安仔騷肌
復合兩年入直路
安仔同 Sammi自 11年 3月喺佐敦太平館嘆豬髀復合斷正後，唔再玩地下情，終於愛得坦蕩蕩，除咗唔介意鬧市拖手拍拖，仲多次一齊外遊。結婚？快啦。
|
鍾意就快D Share啦！
|
|
|
