黃智雯有米男友 甜蜜撐枱腳
【上環】現年30歲嘅「關二嫂」黃智雯有份演出無綫台慶劇《On Call 36小時II》，而且戲份唔少，事業順利！感情方面，佢同現年35歲嘅謝瑞麟珠寶集團高層詹文天（Anthony）發展亦都好順利，可謂事業愛情兩得意。之前黃智雯話要時間互相了解，事隔三個月，雙方都應該了解咗好多，事關早幾日記者又見佢哋拍拖行街。
日前晚上7點，黃智雯揸車去咗男友Anthony位於港島區連道華翠臺嘅屋企，佢自出自入，好熟練咁將架車駛咗入停車場，睇嚟佢都係嚟慣嚟熟。過咗唔夠五分鐘，Anthony亦都揸住佢架平治房車返到嚟，跟住接咗黃智雯上車離開。
■黃智雯同詹文天日前喺上環撐完枱腳，人前又扮曬陌生咁，好避忌。
返歸繼續溫馨
黃智雯同Anthony跟住開車去到上環荷李活道間Trattoria Queen Hollywood餐廳，間餐廳主打意大利菜。佢哋餐飯食得非常溫馨，全程有傾有講，食足兩個鐘至埋單走人。不過，當佢哋行出餐廳之時，即刻變得好避忌，唔敢拖手之餘，仲行得都幾開，行去攞車嗰段路，佢哋完全零交流。Anthony行到熱，最後除咗件外套先上車，之後黃智雯跟咗佢返屋企，繼續甜蜜。
採訪、攝影：畢紹基、楊浩賢、羅德光
■晚飯時，黃智雯四圍望，好警覺。DV圖片
■食完飯，黃智雯坐詹文天車離開。DV圖片
■一落車，黃智雯即刻又四圍望，完全冇鬆懈過。DV圖片
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！
|
鍾意就快D Share啦！
|
|
|
