三線星揸寶馬買名錶 趙永洪進駐凱旋門 MW,

貴賓式待遇

趙永洪買完錶由職員陪同離開。做了大豪客，待遇果然零舍唔同。

娛樂喧

三線星揸寶馬買名錶　趙永洪進駐凱旋門

王維基的香港電視發牌難產，旗下藝人隨即加入失業大軍，不少三、四線藝人為生計索性轉行，如張松枝要學紮鐵、艾威去做鞋匠、劉玉翠則去學中醫，前景令人擔心。

不過，凡事總有例外。在無綫撈了十四年的三線綠葉趙永洪（ Raymond），憑住處境劇《同事三分親》中「 Marco」一角而薄有名氣。據知年年爆騷的他，經常有不少外快機會。密食當三番下，他近日已進駐天價地段凱旋門。上周五（ 1日），本刊拍得他揸寶馬買十萬蚊名錶，生活富貴。

其他影片

近日發牌風波鬧得熱烘烘，不少曾在無綫捱過騾仔的奀星，控訴無綫人工低。不過凡事都有例外， 99年訓練班出身的趙永洪，至今加入無綫已有十四年。多年來，趙永洪參與的電視劇多是閒角，由 07年的《同事三分親》至今日的《愛．回家》都有份演出。雖然知名度普通，騷價得二千，但他個個月爆騷，搵錢能力拍得住二線星。據知他近日搬入九龍站上蓋、呎價三萬蚊起標的五星豪宅凱旋門，生活富貴。

「佢（趙永洪）份人好低調，冇同人講搬咗去凱旋門。我哋只知佢好多嘢做，乜都肯接，但求有錢搵。佢試過拍完外景即刻出騷做司儀，之後再返廠。加上珍姐（曾勵珍）好睇佢，俾好多機會佢，計埋出面啲 job，佢每月最高可以有四、五萬收入。」知情者說。

2萬 5月租豪宅

位於九龍站上蓋的凱旋門，樓齡雖已有八年，但由於位置方便，未來更設有高鐵站，故現時實用面積呎價至少兩萬五千蚊。一個七百多呎的建築面積單位，約售千五萬。

趙永洪租住的單位約七百呎，市租約三萬多元，而趙雖透過「親戚」租住，但租金至少要兩萬五。上周五（ 1日），記者就拍得他現身凱旋門𨋢口大堂，準備返屋企嘆。

處境劇發圍

今年 34歲的趙永洪，自 07年便成為處境劇台柱，拍過五套處境劇。雖然他今年四月便離開《愛．回家》劇組，但外快唔少。

15分鐘使十萬

上周五（ 1日），不用開工的趙永洪，獨自在圓方商場出現。在米芝蓮一星高級食府「九龍廳」用膳後，便開始他的豪使行程。他在商場內行了近一小時，先後在 I.T、 Armani等名店出入，可惜唔啱心水。之後他在 IWC睇中一隻價值 9萬 7的手錶，試戴約十五分鐘左右便撲槌。最後他去超級市場買日用品，之後返回寓所凱旋門。

即試即買

趙永洪入了 IWC專門店試錶，更即試即買，十分豪！

十萬買 IWC名錶

當日趙永洪所買的 IWC手錶屬今年新款，是 IWC與 ANG crossover的工程師系列，售價$97,000。

趙：錶唔係日日買

記者致電趙永洪，他避談富貴生活：「我搬咗都冇一個月，間屋係親戚好平租俾我，二萬五啫，比市價平。（你買隻錶成十萬蚊？）哎……咁錶唔係日日買，我食平嘢嗰陣時你唔知啫。（你經常爆騷喎？）我十幾年嚟都爆騷，其實係有好多出面嘅工作，真係要多謝珍姐，俾好多機會我。」

趙永洪今年 4月已離開《愛．回家》劇組，被無綫安排拍攝其他劇集，困獸鬥幾個月。無綫近日推行禁藝人賺外快新政，相信對靠賺外快的趙永洪嚟講不無影響！

一級食肆醫肚

買貴錶不特止，當日他醫肚的食肆「九龍廳」乃米芝蓮一星餐廳，食個晏晝飯都起碼四、五百。

醫肚後，趙永洪便往超級市場購買日用品，他更對意大利凍肉及芝士櫃十分有興趣，零舍識食。

二手寶馬代步

趙永洪雖然食好住好，但現時用來代步的寶馬是 01年出廠， 20萬有成交，可見他並非揮霍無度。

嗒過朱慧敏

趙永洪在 09年拍處境劇《畢打自己人》時，與同劇的朱慧敏拍拖，雙方例牌否認，拍拖行街時更找來黎耀祥兒子同行作保護。

年賺百萬

趙永洪雖然是三線藝員，他一年拍八套劇，加上工作瓣數多，今年已搵過百萬，絕對是禾稈冚珍珠。

無綫筍工——拍處境劇

唔講唔知，拍處境劇除了開工時間穩定，不用捱更抵夜外，原來計騷錢也非常「和味」。因為處境劇多群戲，即使行行企企冇對白都會有騷錢計，一個月 20集計足 20個騷，勝過其他劇集拍足三個月才有 20個騷錢。

郭少芸

05年棄商回歸無綫的她， 07年便開始拍處境劇《同事三分親》，之後陸續在《畢打自己人》及《愛．回家》演出。名人王賢誌亦因睇中郭有穩定曝光率，找她與四哥謝賢擔任藥品代言人。其實她過往幾年都有不少廣告，如「貴族纖形」及「悅榕莊」等，難怪她可以豪揼七位數，在旺角及將軍澳區開餐廳，實行錢搵錢。

徐榮

今年 39歲的徐榮，出身自 99年無綫藝員訓練班，做了八年二打六，終於在 07年憑處境劇《同事三分親》中的「裘俊」而被觀眾認識，更被提名「最佳男配角」，雖然未能奪獎，但人氣急升。之後徐榮成為不少監製愛將，獲安排拍劇如《火舞黃沙》、《天與地》等，前年及去年分別有八及九部劇出街，產量驚人，成為爆騷綠葉之一。

其他影片

鍾意就快D Share啦！

下一篇 》