霆鋒玩命個唱冧樓逼人爆粗
向來出名搏命的謝霆鋒，以往演出過不少驚險場面，包括被繩索懸空吊掛在會展外牆及跳下八層樓高等危險動作，更與成龍一同被香港本地保險公司列入黑名單，不被受保。不過愛挑戰高難度的霆鋒就未有怕，構思個唱要製作超過80呎高、即場倒塌的道具，希望觀眾看後會激動得爆粗；不過英皇對此反對，而父親謝賢亦表現震驚！
入行以來，謝霆鋒都標籤著膽識過人，主演電影每有驚險鏡頭，他都堅持親身上陣。當中最經典場面包括在《新警察故事》中，被繩索懸空吊掛在會展外牆，更差點被繩索勒到窒息；而拍攝《逆戰》時，他要跳下八層樓，另一幕則是在航行中的郵輪上跳海；至於在最新的《救火英雄》中，不少近距離的爆破場面，令霆鋒一度失去聽力，絕對是「搵命博」！難怪霆鋒自言跟成龍同樣被香港保險公司列入黑名單不受保，要到美國投保，而保險金曾高達6,000萬。
嫌男歌手唔夠man
不過愛向高難度挑戰的霆鋒，近日接受訪問時，就透露希望開一個「高」難度的演唱會，他說：「我有要求，之前本來想開個關於世界末日嘅演唱會，我同公司講道具唔可以矮過80呎，要有塌咗半個嘅自由神像同金字塔呢啲代表性building，但公司話太危險。我唔想睇演唱會變咗只係音樂會，我希望人哋係睇到個幕拉落嚟係會講粗口嘅，要有壓迫感，坦白講我唔想喺紅館開演唱會，我覺得紅館冇驚喜，唔夠癲，如果做會喺室外搞，我再做係希望大家會話『死嘢咁鬼離譜』，如果唔係唔使做！」
霆鋒又認為現今的男歌手唱歌不夠man，更嘲諷說：「做番個男人唔該！」他又表示入行以來從未拍過愛情片，因為要顧及「屋企嗰個」感受，因此對跟內地女星高圓圓的愛情片十分期待。談到個人感情問題，霆鋒自認不是個好男人，他說：「好男人嘅基本係維持一個家，呢一點我已經冇做好，不過我依家先三十幾歲，我認為好男人係需要由時間去證明，十年後再講我係唔係都未遲。」
憧憬童話式愛情
已回復單身的他，坦言離婚後最大的變化就是少了時間與兩兒子見面，他說：「以前一瞓醒就見到兩個仔，依家的確冇咁熱鬧！」至於甚麼時候會有新戀情？他坦言還未遇到合適的女生，亦沒有太多機會認識新朋友，但他強調愛情對他是十分重要，仍然相信童話式完美結局的愛情！
記者致電四哥謝賢問及霆鋒希望來個「玩命」演唱會？他聽罷表現驚訝說：「係咩？我都唔知喎，多謝你話畀我知，咁一定要叫佢做足安全措施，（擔唔擔心？佢拍戲已經咁危險？）我相信佢應該識得照顧自己！」
而經理人霍汶希表示霆鋒上年已經計劃舉行演唱會，霆鋒的構思是世界末日，Mani說：「佢嘅諗法係喺舞台製造一個世界末日，但我哋做唔到，因為比較危險，好多嘢紅館唔會批，其實演唱會未落實幾時做。」
文：名人組
|
鍾意就快D Share啦！
|
|
|
