掃呢頁CODE去手機

2014年4月25日 星期五

[忽然1周 978] 先輸影帝 後輸戲份 朝偉不敵家輝玩罷拍 家輝,梁朝偉,朝偉,張家輝,MW,




戥人開心

張家輝憑《激戰》奪影帝,至於《一代宗師》在金像獎中破紀錄連奪 12獎,偏偏身為影帝候選人的朝偉卻飲恨,難怪事後在慶功宴,他要獨自飲悶酒解愁。

娛樂喧

先輸影帝 後輸戲份 朝偉不敵家輝玩罷拍

張家輝憑《激戰》揮低《一代宗師》梁朝偉再奪影帝,興奮得宣布唔會乘機加片酬,暫企硬 1,200萬。一手造就他兩奪影帝的好拍檔林超賢導演,早於數月前已計劃找從未合作的朝偉與家輝,拍一部賊王在歐洲奪寶的鬥智鬥力戲,睇牌面綽頭十足。

據知朝偉早收了電影大綱,初步已應承對方接拍。但本刊收到消息,與家輝為親密戰友的林超賢,近日見家輝再奪魁,便悄悄加重了其戲份。收到風的朝偉,為免被家輝搶戲淪為陪襯,就算人哋肯俾足 4,000萬片酬,一於唔拍。











私交甚篤

去年 12月張家輝生日,朝偉與 B哥哥醉賀,足證二人友情。

近年導演林超賢開拍的電影全是打到趴低的激烈動作片,新片《魔警》由張家輝及吳彥祖擔正,又是林導槍林彈雨的招牌撒手鐧。不過林導今年計劃開拍的兩套電影卻一反傳統,其中一部是勵志題材,另一部則是賊王鬥智鬥力、遠赴歐洲奪寶的電影。

企硬 4,000萬

據知林導年初已有拍賊王戲的構思,更屬意由 5屆「金像獎」影帝朝偉及老拍檔家輝合演兩大賊王。為顯誠意,早於一月初,已與投資電影的英皇老闆楊受成,相約朝偉見面傾合作,更奉上電影大綱讓朝偉過目。席間林導與楊受成輪流落足嘴頭,指朝偉與家輝的戲份必定會「同等咁多、同等咁激」,更包保有個煥然一新的角色。知情人透露:「偉仔咁多年都以拍王家衞嘅戲為主,而且啲角色都係好沉鬱,一拍又幾年,搞到情緒好 down。其實偉仔鍾意拍輕鬆氣氛嘅片種,佢對上一套笑片,已經係 05年嘅《韓城攻略》。雖然偉仔同林導未合作過,但佢聽完個故事大綱覺得幾得意,最重要係英皇出得起片酬,偉仔企硬 4,000萬,佢哋都冇還價,真係好有誠意!」

打低偉仔

上星期《香港電影金像獎》,張家輝揮低朝偉,上台攞影帝一刻,兩人肉緊互相捽面。

興奮忘形

梅開二度封帝,張家輝興奮得在台上做出揮拳動作。

輸獎失落

梁朝偉失落影帝,分別奪「影後」的章子怡及「最佳導演」的王家衞紛紛安慰他。

暗加家輝笑料

雖然林超賢口口聲聲表明朝偉與家輝有同等戲份,但與家輝多年老死的他,眼見老友憑自己執導的《激戰》再攞影帝,林導即悄悄加重了家輝戲份,滲入大量搞笑元素讓他發揮。動作方面,也會搵專人設計幾款吊住威吔及跳傘等等的打戲,務求家輝做到型、英、帥。

據知收到風戲份被搶的朝偉,縱使對角色有興趣,最終仍決定推戲,寧願見財化水。知情人續說:「其實偉仔依家咁嘅神枱級數,接戲根本唔係為錢,拍完《一代宗師》之後,佢大大話話推咗十幾部戲,見劇本唔啱,都費事嘥時間。難得今次佢睇完大綱已經好有興趣……不過冇計,林導同家輝合作開,有私心在所難免,掉返轉王家衞都會留番啲好嘢俾偉仔一樣。更何況偉仔同家輝堅 friend,無謂為咗拍戲傷感情,唔接最實際。」據知林超賢近日積極斡旋,希望梁朝偉能回心轉意。

日前記者向林導求證,他表現十分避忌,但坦承與朝偉斟洽過:「我哋係同偉仔出嚟傾過,但好初步咋,其實劇本都未整好。(有傳你暗中加咗家輝啲戲,令偉仔辭演?)整好劇本再講」而朝偉透過經理人公司澤東回應稱:「總之梁生要睇曬完整劇本先決定。」

票房保證

伯樂林超賢造就家輝兩次奪影帝,而《激戰》票房逼近 5,000萬,早前二人走勻多間戲院向觀眾謝票。

心魔考演技

近年林超賢積極幫家輝轉戲路,剛上映的《魔警》家輝一人分飾兩角,其中一個角色更扮演吳彥祖的心魔,演技大考驗。

家輝望合作

家輝經理人鍾珍在電話中表示:「啲戲份梗係勢均力敵先好睇,我哋都想同偉仔合作,不過唔知佢個期得唔得。」

接戲睇心情

其實朝偉推戲早有前科,作為 5屆「金像獎」影帝的他,推戲絕不手軟。他曾言:「我不需要太多錢,亦不用更出名,如果心情不好,部戲一定唔接。」事實是自 12年尾拍罷《一代宗師》,他索性剃頭長休,其間已推掉十多部戲,全行應該得佢可以。

拒演諸葛亮

07年,吳宇森開拍《赤壁》並落實找朝偉演諸葛亮。但睇完劇本後,朝偉發現角色有大量古文對白,因沒時間熟讀為免令角色失真,決定辭演,改演周瑜,諸葛亮由金城武頂上。

不做漢奸

12年,朝偉接近動筆簽約拍中日合作電影《 1905》,但當時中日關係緊張,網民反應激烈指他漢奸,為平息風波決定唔接。去年 2月該電影公司因朝偉退出製作停頓,致公司周轉不靈宣告破產。



鍾意就快D Share啦!