「魔警」張家輝冧爆師奶 吳彥祖指囡囡已經學行
2014-04-06 19:00:00
張家輝少有去商場宣傳，引得一班fans開心到暈！（攝影：溫敏芝）
張家輝、吳彥祖（Daniel）、林嘉華、思漩同埋導演林超賢，今日喺將軍澳出席電影《魔警》宣傳活動，好少喺商場宣傳嘅影帝家輝，梗係吸引過百市民圍觀啦，家輝仲好親民走埋去同市民合照，搞到一班男女老幼都鬼咁開心。
成班演員又同導演喺台上玩遊戲，之後司儀問家輝，如果票房好想點慶祝？家輝即講笑話梗係要錢。
事後佢受訪：「呢啲係順勢對白。」問到佢係咪廉價勞工？佢笑話：「唔係廉價，但加得就加嚇，我都係講下笑。」不過佢從影多年，如果票房好最令佢開心係加錢。
講到佢之前嘅《激戰》收4400萬，今次係咪好大壓力？佢話其實《掃毒》都有3千幾萬，咁係咪變成票房保證呢？家輝又話：「又唔係，我都覺得唔係次次咁好彩，但都想貪心啲，攞埋呢次。」
家輝又話導演原來拍戲時都收收埋埋，有啲構思佢都係睇戲先知，連佢都呃埋，家輝話：「之前有人話我戲份太少，但只要係導演想做，我哋之間冇所謂。」
問佢今次有冇走火入魔，抽離唔到？家輝笑話：「魔就經常有走緊啲，呢件事冇乜魔唔魔，成件事幾enjoy。」有指家輝將與梁朝偉合作新戲，家輝話未定，自己當然想事成，偉仔係佢好欣賞嘅演員，好希望合作。
同場嘅吳彥祖就話，最近喺加拿大拍緊一部動作戰爭片，專登請咗10日假返嚟宣傳，佢話對於票房唔緊張，但如果票房好，希望再同家輝合作，因為今次同佢戲份少啲。
問佢去咗加拿大拍戲，係咪好掛住囡囡？佢即話：「掛住，每分鐘都掛住，因為佢0依家10個月已學行，仲要好有決心，玩具都唔係好玩。」
佢話學行係一個好大嘅階段，見唔到會好可惜，所以都有叫太太記得拍片。
家輝仲喺台上玩遊戲，玩得幾投入喎﹗
家輝啲fans好多喎！
家輝講笑話票房好，最好加片酬！又話希望同梁朝偉合作新戲可以成事。
吳彥祖就話掛住囡囡，要老婆拍片俾佢睇。
吳彥祖希望再同家輝合作，因為今次對手戲太少喎。
|
鍾意就快D Share啦！
|
|
|
