馮仁昭四圍超：膠遊記累街坊 拖冧黃金檔 - 馮仁昭
膠遊記收過千宗投訴 拖冧黃金檔
非常膠劇《西遊記》終於派成績表喇！首周播映，一度跌至最低18點（117萬觀眾），一周平均收視係22點（143萬觀眾），比起之前播嗰套《愛我請留言》勁瀉咗4點（26萬觀眾）。黃金時段其餘兩線嘅收視都慘被膠劇拖累。《愛回家》跌1點（6萬4千觀眾），平均23點，《女人俱樂部》跌2點，平均24點，首周已經跌到咁，之後真係不堪設想。無綫仲收到44宗投訴，觀眾齊叫無綫唔好播。
■通訊事務管理局總共收到超過1100宗投訴《西遊記》。電視圖片
收逾1100宗投訴
收視口碑都唔好，搞成咁應該要腰斬喇！但係無綫就企硬話冇諗過，仲話會加強宣傳，今次觀眾實行要同《西遊記》鬥長命！宇宙膠劇上周三跌到得18點，最膠要數變大縮細嘅天蓬元帥被指派到花果山捉拿孫悟空失敗被兜巴星，之後再被班馬騮兜腳踢番天庭。至於通訊事務管理局截至噚日收到超過1,100宗投訴《西遊記》，特效誇張、粗糙，人物造型令人不安，而硬撐膠劇嘅《東張西望》總共有93宗投訴，話無綫公器私用。
撰文：馮仁昭
■《女人俱樂部》收視跌咗兩點，呢個陣勢似乎真係唔多掂。
|
鍾意就快D Share啦！
|
|
|
