掃呢頁CODE去手機

2014年6月26日 星期四

[壹週刊 1268] 拒用替身 陳法拉頸椎移位急入院 陳法拉,M1,




拍戲時不慎傷及頸部舊患的法拉,上月突然感到手腳麻痺,急急入院求醫。為避耳目,醫院專登開放緊急出口俾法拉返回病房。

探熱針

拒用替身 陳法拉頸椎移位急入院

去年離開無綫闖影壇的陳法拉,早前接拍由鄭中基執導的電影《神秘寶藏》,戲中飾演長洲原居民的她需要演出大量打戲;唔識打又唔肯用替身,結果搞到周身傷,甚至觸及頸部舊患。

上週,法拉因為頭部及頸部突然劇痛及出現手腳麻痺,要即時返港入院就醫;照過磁力共振後,證實頸椎其中兩節骨嚴重移位。

手腳麻痺

陳法拉上月隨新片《神秘寶藏》劇組到廣東省海陵島拍外景,在戲中七成戲份都要打的她,雖然數月前已開始跟師傅惡補功夫,但在當地四十多度高溫下每日開工十粒鐘,體力透支唔在講,拍攝其中一場動作戲時,更因為用錯力而扭傷頸部,需要即時停工返港。

「嗰場戲要用皮鞭打交,條鞭都幾重,法拉唔識發力,用錯力所以扭到條頸。其實有好多高難度動作,導演都叫佢交俾替身做,因為怕佢根本應付唔到,但佢又唔肯,雖然電影公司有幫大家買保險,但搞到自己成身傷,點都會有手尾。法拉扭親頸之後,即晚就嚟料,手腳痺到冇知覺,個頭又劇痛,所以要提早返香港睇醫生。」一名劇組工作人員說。

上星期,身穿便服帶住囗罩的陳法拉現身醫院,據目擊者稱,見醫生後,法拉被安排直接送入病房。

當晚法拉在助護陪同下到 X光部照磁力共振。

法拉堅持親身上陣拍打戲,結果搞到滿腳瘀傷(箭嘴)。

數月前,法拉已跟師傅惡補功夫。

唔拖得

頸椎是由七節脊椎骨所組成,上部第一二節負責頭部右左活動;下部第三至第七節負責頭部前後擺動,頸椎移位,一般是因坐立姿勢長期不正確或肩頸長期受壓造成,由於頸椎連接大量神經及血管,患者不但會頸痛,更會出現頭痛、耳鳴及手部麻痺等問題,如不及時治理,可影響四肢活動能力。

頸椎移位須配合物理治療醫治,強化肌肉,將移位部分復元;嚴重則要做手術,但有一定風險,甚至有全身癱瘓的危機。

有機會癱

當晚八點半,陳法拉在護士陪同下步出病房,到 x-ray部照磁力共振,她亦聽從醫生建議,留院觀察,等待報告。

「佢條頸有兩節骨移咗位,壓住神經線,醫生唔建議做手術,因為風險好大,而家安排佢定時做物理治療,呢段期間,佢唔可以做劇烈運動,如果處理得唔好,隨時有機會癱。」知情者說。

出院翌日,陳法拉已投入工作,為首飾店做開幕嘉賓,提到在內地拍戲情況時,她大吐苦水。「又熱又辛苦!差唔多成五十度,真係有少少中暑,瘦咗幾磅。」對於打到傷曬,她說:「而家條頸都唔係幾鬱得,要做物理治療。」

法拉出席活動時自爆頸部受傷,表示條頸唔多鬱得!

法拉頂替舒淇接拍鄭中基執導的新片《神秘寶藏》,近日到海陵島開工,預計仲有個半月才煞科。

早前加入了「明星瑜伽團」的法拉,現在要暫停上課,免得再加重頸部傷患。

出院第二日,法拉即要做「空中飛人」,廿四小時內香港上海兩邊飛。

自從同薛世恒離婚後,法拉失去靠山,唯有密密接 job搵錢。

離開無綫後,法拉轉戰影壇,去年在《奇幻夜》瞓身演出。

手尾長

演員唔一定樣樣皆能,尤其拍動作鏡頭,替身唔少得,但有不少藝人鍾意逞強自己嚟,搞到中招留手尾。

周麗淇

04年,首次擔正古裝劇《秀才遇著兵》女主角,周麗淇搏到盡,騎馬吊威吔等場面甚至危險動作都唔用替身,結果搞到頸椎移位,要長期服食止痛藥。

陳敏之

10年拍古裝劇《公主嫁到》,日日要戴住十磅重頭飾開工,陳敏之不勝負荷,扭傷頸造成多節頸椎移位,壓住神經線,嚴重時期,連手指都鬱唔到。

佘詩曼

早年先後發生兩次車禍,傷及頸部及尾椎骨;去年尾,頸骨中段再次出現嚴重移位,壓住神經線,出現手部麻痺要即時入院治療。

林峯

10年為劇集《花花世界花家姐》拍電單車戲,因為戴唔啱 size頭盔,導致頸椎移位,其中兩節骨凸出壓住神經線,膊頭同頸都唔鬱得,林峯要停工入院,留醫兩日接受物理治療。



鍾意就快D Share啦!