【房東涉毒】都算「半個屋企人」 吳綺莉談犯錯：咁做錯嘢要改過，好似我咁…
2014-08-26 13:31:00
一講到「半個屋企人」，吳綺莉即正色道:「唔係太關我事囉!」(攝影：盧妹)
鄭丹瑞同吳綺莉今日齊齊現身數碼港DBC數碼電台訪問，吳綺莉受訪時已表明自己港聞同娛樂新聞都有睇，但實在唔想回應關於祖名嘅事，因為唔想有是非。但話晒祖名都係「半個屋企人」喎……吳綺莉即正色道:「唔係太關我事囉!我只希望我識嘅人都開開心心身體健康。自己呢行多年，都睇到慣(負面新聞)。」又再三強調唔想回應。
續問道點睇再有藝人吸毒？吳綺莉就話:「我覺人得有兩種，男同女。各有不同職業學業，但冇話係唔係娛樂圈。」不過接受內地及電子傳媒訪問時，吳綺莉都有表示希望大家再俾次機會祖名，並謂:「每個人都會做錯嘢，人誰無過，咁做錯嘢梗係要改過，好似我咁，係咪？」
同場嘅阿旦好耐冇開咪，一見番個咪就猛話好想再開咪，特別係最近。阿旦話已經十幾年冇做DJ，全身離開亦已經十年，故笑謂要主動去向各大電台求職喎。咁想做邊種類型節目？佢就話:「梗係搵啲年輕貌美嘅做新啲嘅嘢啦。」至於可考慮返娘家商台？阿旦話:「今晚會返去(商台今晚舉行55周年晚宴)，真係有衝動想做。(唔怕日日開咪好困身？)咁當然如果做精品嘢就最好啦。」
談到世姪祖名涉毒被捕一事，阿旦話:「年輕人吃一次虧，最緊要知道要改。呢個係人生好大嘅考驗，以祖名嘅聰明，可能冇事，而且會令佢成長同成熟。」
阿旦再謂:「祖名係男人嚟，男人應勇於面對自己過失。」咁開下一部新戲時會否搵佢？阿旦就話:「好難講。一來唔知下一戲做乜，二來都唔係我話晒事。」但如今外間猜測眾多，更有傳祖名或將面對牢獄之災，對此阿旦只表示:「你都話係猜測，猜測嘅嘢我就唔講喇。佢係年輕人，仲有好多日子，可能呢件事會令佢開竅，係一個契機都唔定。」
阿旦話一見番個咪就猛話好想再開咪。
吳綺莉又話希望大家再俾次機會祖名。
|
鍾意就快D Share啦！
|
|
|
