2014年10月20日星期一

「發哥世姪女」仆住出場照樣入圍發哥,周潤發,

【亞姐又嚟喇】「發哥世姪女」仆住出場照樣入圍

2014-10-19 23:57:00

雖然亞視又拖糧，但今晚依然落本喺佛山搞咗個《亞姐總決賽前哨戰》，而原本有24佳麗入圍，今晚就得23個出席。大會解釋係14號徐茜以私人理由退選，最後會foul 3個佳麗，即20人入選決賽，現場有亞視高層葉家寶，嘉賓袁潔儀，張嘉瑩，黃集鋒等人做評判。

第一part節目，一班亞姐跳舞出場，著上透明外套，入面就係露腰小背心，加埋短牛仔褲，跳完就換泳裝見人，由司儀蔡國威抽籤玩對疊，兩個pk答問題，其間亦選咗一個佳麗獲「表現優秀獎」，由9號奪得，獲大會頒發一萬蚊獎金，而最後被Foul嘅有4號梁婷婷，5號徐亞男以及16號陳伊莎。

出場時，「發哥世姪女」24號陳沛鈺上次第一回比賽，已經被彈著衫勁娘，今次一出場更出師不利，仆住出嚟，差啲跌到台上，跳舞又甩beat，但最後竟順利入圍。

比賽後問到24號陳沛鈺對自己入圍會唔會驚訝?佢就話:「唔驚訝，表現可以再有進步。」但佢出場時失手?佢竟然話:「其實冇。」真係失重心喎，佢就尷尬笑:「睇得咁清楚?小小失手，我都好有實力。」咁係咪好幸運?佢話:「幸運都係一部份。」講到佢問答環節表現差，佢話:「都有進步空間嘅。」爆冷?佢話:「唔算，我好比心機，一路有進步過。」佢話髮型係大會搵髮型師整，記者問覺唔覺得玩佢?佢話:「唔會，好專業嘅。」佢反問係咪「型得滯」，記者話係師奶得滯，佢就回應:「我會反映下。」至於大會寫佢上圍17吋，佢就話自己係其實係「34C」，唔知點解會變咗37吋。

而拎咗「表現優秀獎」嘅9號韓非兒就話都有驚訝，又話:「大家都優秀，盡咗自己努力，今晚就比自己95分，冇咗5分係因為緊張。」