麟李過億飲食王國 全麵攻日
【衞紫敏澳門直擊】唱而優則「食」的譚詠麟與李克勤成功「三年抱四」，第四間粥麵店昨日在澳門正式開張，兩位飲食界巨子下一步大計首先是要「吞」併日本，誓要將港式雲吞麵取代日本拉麵！麟李接下來計劃在世界各地全「麵」進發，目標開夠廿間分店再上市，以億元重金打造飲食王國！
兩位老闆譚詠麟與李克勤昨日到澳門新濠天地「蘇濠」，為第四間「左麟右李粥麵小菜專門店」澳門旗艦店主持開業儀式。他們聯同其他股東張國忠、周焯華及唐才智等剪綵，現場安排醒獅表演及切燒豬環節，寓意生意蒸蒸日上。
日本妹鍾意食雲吞麵
麟李繼2012年在黃埔開第一間店後，其後在銅鑼灣及上海再「添食」，今次澳門店已是三年內第四間的分店，可謂「三年抱四」。滿腹發達大計的麟李稱有意繼續擴大版圖，最終目標要分店在全球插旗，至少開夠廿間再上市。據知，他們早已投資超過八位數，相信將會出動逾億元大展拳腳。
今次進軍國際的第一步，克勤瞄準「麵界」龍頭大佬──日本，他受訪時稱：「最想喺日本開分店，因為日本拉麵遍布東南亞，係時候要用雲吞麵嚟回饋日本。」阿倫則希望用自家雲吞麵來箍實日本妹的胃：「好多日本妹都鍾意食雲吞麵，仲食到『雪雪』聲！」他們又透露上海分店試業的威水史：「當時排晒長龍，天怒人怨，仲打嚟香港話去咗五日，每次排成個幾鐘先食到！其實食唔到都係其次，入唔到先冇面呀！」
阿倫爆克勤衣錦還鄉
阿倫又踢爆克勤的父母是澳門人，今次能夠以老闆身份進駐澳門，可算是衣錦還鄉。問二人今次新店投資數目？阿倫透露是由黃埔店錢滾錢得來：「全靠一路由黃埔店生（錢）出嚟。（唔使本？）用我哋身價囉，所以可大可小。」麟李預告將再度在農曆新年檔期於紅館開騷，笑言屆時會派出人力車及筲箕籃接歌迷們的利是。
另外，對於香港近日的普選爭議，阿倫直言「佔領運動」影響了分店生意：「一路生意都係向上，上得幾好，仲要兩、三倍咁上。搞一搞都冇辦法，係影響咗，希望件事通番。」一直在加拿大等地開騷的阿倫自爆與溫拿其他成員，在每場巡唱都會獻唱《獅子山下》，更特意改歌詞為港人打氣：「改咗做『我哋大家用真心真意相互勉，珍惜香港才是對』，中國人有句說話，家和萬事興，家衰口不停，應該以和為貴，係時候去傾好佢，進退有據。」提到傳出有藝人因政治議題發聲而被內地列入黑名單，麟李不相信事件，相信只是網上傳言。
|
鍾意就快D Share啦！
|
|
|
