祖藍勁裸膽床戰黑絲小儀
以重口味為賣點的台慶劇《老表，你好hea！》，繼林盛斌（Bob）啜爆陳嘉佳（細細粒），又與張繼聰做「裸模」後，劇集再次挑戰觀眾底線，王祖藍將與阮小儀大玩「哈比人之戀」，除施展「校服誘惑」外，祖藍更犧牲色相除剩褲仔「速食」對方，認真「裸」膽！
由王祖藍、萬綺雯、張繼聰和王菀之等主演的無綫台慶劇《老表，你好hea！》反應熱烈，當中的「重口味」劇情可謂一浪接一浪，繼林盛斌（Bob）與陳嘉佳（細細粒）啜冧床，以及張繼聰與Bob做「裸模」擺騎呢甫士後，原來好戲在後頭！飾演「富二代」有鬼仔性格的祖藍，最終居然睇中「富婆」阮小儀，為了一日內取得伊人芳心，他更施展渾身解數力追小儀。兩個「五呎差吋半」的哈比人，不但扮純情大玩「校服誘惑」，更漫步沙灘搞浪漫，晚上祖藍化身「餓狼」，除剩褲仔「速食」對方，場面惹笑。可惜小儀突然喊停兼開出條件，要求祖藍捧紅飾演妹妹的李亞男後，她才願意接受祖藍的追求，結果未能得米的祖藍只能「陪瞓」。
自嘲會令觀眾「絕食」
祖藍昨日率領萬綺雯、李亞男、韋綺珊、黑妹等出席《老》劇宣傳活動，提到與小儀的「床戲」，他笑道：「好多人話聽蔣志光、韋綺珊《相逢何必曾相識》食飯特別開胃，當睇到Bob同細細粒就全部嘔番晒出嚟，我同小儀嗰場應該會『絕食』好多日。」劇中，張繼聰與Bob不乏裸露場面，問到會否也有裸露戲？曾扮演「Handelababy」的祖藍稱「乜都着過晒」：「呢次留畀佢哋啦，一來阿聰咁好身材，二來Bob咁唔好身材都露，我邊夠佢哋嚟呀！」正籌備新劇的他希望發掘更多滄海遺珠及新星，又笑言女友李亞男已夠紅，毋須靠他力捧。
小儀接受電話訪問時透露談情戲在烏溪沙取景，兩人更會攬攬、摸手仔和食雪糕，她笑謂：「總之好嘔心，仲有砌心形石。」對於被指床戲不及細細粒、Bob厲害，她說：「其實我唔介意o架，上次《情人眼裏高一D》都錫過，再拍床戲冇所謂，今次真係輸得好唔抵！」她更無視「正印」李亞男，稱與祖藍天生一對。
張繼聰遇襲嗌「封肌」
劇中經常騷肌的張繼聰，昨日在活動上自稱不是艷星要「封肌」，原來他在日前遭女粉絲「胸襲」：「有次去大排檔食飯，個阿姐揸住我個胸影相，當然好多謝佢哋支持，但睇到呢個社會男女唔平等，平時見到女仔行性感形象，你唔會咁o架嘛。」談到與Bob做「裸模」，他坦言拍攝時未有為意肉色褲仔激凸，直至打格的宣傳片播出後才開始擔心。
獲監製黃偉聲睇好奪「最佳男配角」的Bob，昨日謙稱自問未能贏獎：「咁多猛人喺度，Benz雄（許紹雄）、維維（梁烈維）都做得好好，我冇乜演技，不過今年我拍咗兩套劇、做好多綜藝節目，都算有進步。」是否恨攞「飛躍進步男藝員」？他指獲提名已很感恩，志在參與，最希望《老》劇獲「最佳劇集」獎。
文：影視組
|
鍾意就快D Share啦！
|
|
|
