【Sammi尾場】Sammi向「老公」情深唱《默契》 安仔豎姆指狂讚
2015-01-03 00:46:00
（採訪﹑攝影：馬建華﹑葉君海）
鄭秀文（Sammi）今晚尾場個唱，encore時唱咗《唯獨你是不可取替》的慢版，佢仲話過去咁多場都冇唱到（慢版）。
當佢唱緊時，原本坐喺VIP席嘅許志安，突然唔見咗，全場都期待安仔上台，點知冇幾耐安仔又喺VIP席出現返。現場觀眾不停大嗌安仔，Sammi都忍唔住笑言：「仲乜鬼呀？」
而Sammi一路唱背住VIP位置唱呢首歌，但安仔坐埋位時，現場射燈便射向安仔，令佢尷尬失笑，而安仔側邊的鍾楚紅﹑劉德華及容祖兒﹑黃偉文都笑埋一份。現場有人叫Sammi做許太，十嫂，但Sammi就話：「我唔會睬你哋，你哋死心啦﹗」
最後Sammi個唱於晚上約11時40分結束，以《默契》作結，其間VIP席的嘉賓已經走晒，不過安仔仍然留守最後睇到尾，當Sammi唱到：「誰能及你等於我一切」，則情深款款望住安仔唱。直至Sammi返落台後，安仔先捨得走，佢仲對住個台豎起手指公。
另外，唱《默契》前，Sammi表示有唔係佢自己的歌，但就好想唱：「開會時好想唱，但所有監製工作人員嗌唔好，因為嗰首歌唔係我，但嚟到最尾一場，大家畀三分鐘時間我，加上個場係我嘅，我都唱咗成晚自己嘅歌。」
Sammi唱咗林奕匡嘅《高山低谷》，佢話好鍾意首歌，唱到臨尾時，由於唔熟歌詞，佢攞埋貓紙喺台上唱：「渴望被成全，努力做人誰怕氣喘。」佢大讚份詞填得好好，自己好鍾意。講完後，佢又突然衞蘭上身，喺份歌詞中變出雞蛋仔，兼即時咬咗啖雞蛋仔。
此外，Sammi前經理人李進都有捧場，佢笑言：「自己當初出道，多謝李進，（向李進方向大嗌）我今日掂咗喇，不過我唔會分畀你，我畀咗四張飛你，都幾皮嘢，但係真係好多謝你。」
安仔留到最後﹗
睇到拍爛手掌
華仔任壓軸嘉賓。
絕不欺場。
|
鍾意就快D Share啦！
|
|
|
