17/3
冇見半個月，唐詩詠與洪永城相約到中環歎日本菜。
娛頭
拍拖斷正 怕再愛錯賤男 觀察洪永城半年 唐詩詠：佢係唔錯選擇
崔建邦同後生十三年的𡃁模陳嘉莉傳閃婚，至於被他折磨了九年、四合四離的舊愛唐詩詠，亦與外表同屬花弗類的洪永城，秘密拍拖兩個月。
據了解，為怕再上錯船愛錯賤男，明知對方有意追求的唐詩詠，遲遲不敢接受洪永城，觀察期足足半年，見對方不肯放棄，又花盡心思氹自己，加上期間行為良好，對她一心一意冇異心，兩個月前，唐詩詠終於正式和洪永城拍拖。
終於有着落！唐詩詠更被本刊撞破夜晚收工趕往洪永城屋企開餐，但驚見記者，即刻嚇到過門不入；上星期二（三月十七日），二人拍拖到中環食日本菜，斷到正！
買定外賣
因為合作《載得有情人》同洪永城傳出緋聞的唐詩詠，一直唔認拍拖，就算男方公開表態有追求之意，唐詩詠依然堅持只在了解中階段，不過有圖有真相，二人連續兩次約會，都被本刊撞破。
早前，洪永城要為大台遠赴印度拍旅遊節目，一去半月。出發前一天（二月二十八日），當日下午出席完公開活動後，洪永城第一時間揸車趕返西灣河鯉景灣寓所，晚上七時，他落樓買外賣，原本一條大路一分鐘就可以行到去目標餐廳，但洪永城竟然選擇兜入公園，花近七分鐘行另一條路，沿途又不時「目測」泊在路邊的車輛，似是要留意是否有傳媒埋伏。
等外賣時，洪永城不斷用 WhatsApp語音功能同人聊天，全程表現開心，一副冧女樣上晒面。最後，買了兩盒外賣和取回一袋磅洗衣服返屋企。
撞破速逃
一個多小時後，著住深藍色衫黑褲黑帽戴埋口罩的唐詩詠現身，同洪永城一樣，她選擇行人少啲和光線暗啲的公園小路，沿途亦不斷四圍望，但去到洪永城屋企樓下發現記者，唐詩詠方寸大亂，嚇到過門不入。
壹：點解仲唔上樓呀？
唐（尷尬扮傻）：去邊度呀？
壹：唔係去搵洪永城咩？
唐（搖頭苦笑）：……唔……
壹：佢買咗外賣，你唔上去一齊食？
唐（不斷擰頭）：……
壹：其實你哋都公開㗎啦，唔怕喎！
唐：咩公開呀？
壹：唔使咁怕醜
唐：我好怕醜呀！
壹：有冇打算幾時公開呀？
唐：我結婚嗰陣你哋會知㗎喇！
之後唐詩詠急步離開洪永城的大廈範圍，逃之夭夭！過了半小時，洪永城突然落樓，幫女友查探一下，記者是否已經離場。
壹：詩詠啱啱嚟過喎！
洪（扮傻）：係咩？我唔知喎！
壹：你哋幾時公開呀？
洪：我唔知喎，其實我都係去買嘢行個圈咋！
壹：你聽日出 trip，佢特登過嚟搵你？
洪：係呀，我聽日出 trip。
壹：成日要收收埋埋，會唔會好辛苦？你哋發展到乜嘢階段？
洪：多謝關心，多謝關心，多謝關心……
壹：你有冇佢屋企鎖匙呀？
洪：我得我自己屋企鎖匙。
想出埠前與唐詩詠相聚一刻的洪永城見事敗，唯有死死氣返上樓，自己食晒兩盒外賣。
撐枱腳歎日菜
洪永城由印度返港後，緊接埋位開新劇《波士早晨》，唐詩詠亦要趕拍《公公出宮》，連日來，二人收工便各自返歸，直至上星期二（三月十七日），唐詩詠收早，只見她一收工就急住揸車到中環半山羅便臣道一個公眾停車場，原來洪永城一早已在等候，唐詩詠泊好車，就跳上男友的座駕，到一街之隔的衞城道食日本菜。
一餐飯食了兩個半小時，離開時，多了谷德昭女友林子瑄做電燈膽，沿途行去攞車，唐詩詠同洪永城有講有笑，二人對附近幾幢新落成的豪宅眼望望，睇到頭岳岳又手指指，相當有興趣。
一行人上晒洪永城車後，先送唐詩詠返停車場攞車，再分頭離開。
記者再到洪永城屋企守候，半小時便見他現身，還一改常態，未有將車泊入停車場，只停在路邊，之後再行小路返屋企，其間小心翼翼神神秘秘。
傾慕女神
據了解，唐詩詠正式接受洪永城至今，只開始了兩個月，怕再愛錯賤男的她，一直同對方保持朋友關係，唔敢貿然接受。
「 Tony（洪永城）好耐之前已經覺得 Natalie好索好正，後來有機會合作拍《載得有情人》，仲要有兩場嘴戲，佢不知幾開心！相處過仲覺得 Natalie個人好好，對人唔會分大細，大家又傾得埋，不過嗰陣 Tony都唔敢追，因為 Natalie同崔建邦啲關係仲好似未搞清楚，所以只係間中 send吓 WhatsApp，傾吓電話咁。」洪永城身邊人說。
直到去年七月，《載》劇準備出街，兩人不斷被安排情侶檔宣傳，見面機會多，二人亦加深了解，加上當時崔建邦已有新女上手，放生了唐詩詠，洪永城見機不可失，立即開始發力追。
「啱啱先甩拖， Natalie唔想咁快開始，亦想睇定啲，因為有人同佢講 Tony好仔，亦又有啲人同佢講佢好花弗，唔想再受傷， Natalie決定再了解吓，睇定啲。 Tony都好好，都無擒擒青，俾時間 Natalie慢慢考慮，但佢唔會乜都唔做，每次出 trip，都會花心思搵啲小禮物俾佢，最重要係呢段時間 Tony都冇緋聞，又自動自覺同其他女仔保持距離，唔俾機會啲姣精埋身， Natalie心中有數！後來 Tony公開表白，話對 Natalie有三百個 like，擺明誠意十足。」唐詩詠身邊人說。
合格過關
今年情人節前，洪永城終於成功過到「觀察期」，被唐詩詠正式確認男友地位。本週一（二十三日），被問到拍拖問題，唐詩詠依然企硬唔肯認。
壹：同洪永城發展成點？
唐（敖嘉年在旁邊大笑）：朋友囉！
壹：唔係喎，我哋影到你哋成日見，你又上佢屋企。
唐：嗰次係朋友聚會，因為 farewell佢去做嘢，成班朋友一齊食飯，我要做嘢，所以我遲咗去。
壹：你哋見得好密喎！
唐：唔係，其實好難約。
壹：發展到深入階段未？
唐：都係咁作為朋友，佢係一個唔錯選擇。
壹：係咪怕佢花弗？
唐（緊張搶答）：唔係，佢唔係啲咁嘅人嚟嘅！
冧笑回應
分別問到兩人感情問題時，他們口供一致，同樣都係開心笑，個樣甜到漏。
夾晒口供
翌日，（二十四日），洪永城回應戀情時，明顯夾好口供。
壹：你同唐詩詠成日約會，已經正式拍拖？
洪：食飯嗰啲係普通嘅朋友聚會，你哋上次影到佢喺我屋企出現，係我同啲朋友聚會，所以叫埋佢一齊，淨係咁多啫！
壹：你覺得唐詩詠點呀？
洪：呢個女仔好好，大家都覺得佢好好嘅。
壹：佢好似有啲擔心你都係啲花弗人喎！
洪：係咩？佢好似冇同我咁講過喎！
壹：你會唔會做啲乜嘢，等佢安心啲，即係公開或者當佢係結婚對象？
洪：諗得太長遠，我而家都係做好自己嘅工作先。
錯愛
現年 33歲的唐詩詠，一向清純，入行多年近乎零緋聞，但偏偏每遇「花心賤男」。
崔建邦
05年與唐詩詠合作主持《 K-100》撻着，男方不斷瞞住女友偷食，但女方依然死心塌地，拍拖九年，多次離離合合， 09年，崔建邦因毆打中巴混血模鄺敏慧爆出三角戀，唐詩詠即撇，其後男方出盡冧招，氹掂再復合。但病態溝女的崔建邦死性不改， 10年，再傳出搭上郭思琳，去年崔建邦被踢爆有新歡陳嘉莉，二人關係才正式結束。
識氹女
口齒伶俐又鍾意氹女仔的洪永城，異性緣旺， 12年，有傳拍拖多年的女友 Emily難忍他偷食，提出分手。
|
鍾意就快D Share啦！
|
|
|
