2015年3月2日星期一

周潤發手印已化為烏有翁靜晶：星光大道邊間管理公司？翁靜晶,周潤發,

【掌印消失】周潤發手印化為烏有？翁靜晶：星光大道邊間管理公司？

2015-03-02 12:44:00

曾幾何時，發哥嘅手印疑清晰可見？！(網上圖片)

位於香港尖沙咀嘅星光大道，一向好多遊客聚集，為怕人多擠迫，好少港人會特意去睇，目前變成點，相信唔係好多人會知。

呢個聲稱斥資四千萬打造嘅景點，容納近一百個電影工作者嘅紀念牌匾，不過當中以「星光足印」最多人睇，因為唔少天王巨星都喺紀念牌匾上，打上手印，更任由遊客可以喺手印上影相，不過一直被質疑點解打上手印嘅紀念牌匾要放喺地上任人踩、任人摸，究竟點去保養?

翁靜晶噚日喺facebook貼出遊客去星光大道嘅相，佢留言指：「『星光大道』上，劉家良的手印，點滴在消失。已故鮑方先生，亦如是。熱情的遊客，愛用手按在名人手印上拍照，日子有功，模型就此被損壞掉。」

翁靜晶續言：「周潤發的掌印，經已是完全消失了，還有就是周星馳等人，不能盡錄。建議當局，盡快將已故影藝人的掌印同玻璃封好。逝者已矣，再不可能邀請他們補打。請正視一下問題，感謝。」

旋即引起網民於翁靜晶嘅facebook討論，有網民留言「掌印應該打直楝高係展覽廳，唔係放係地下，任人踩」；又有網民最近曾去星光大道，話問題嚴重，唔明點解荷李活嘅名人掌印，歷經滄桑仍清楚可見，質疑香港星光大道冇人保養。

今日翁靜晶亦喺facebook回應：「周潤發的手印已化為烏有，亦該從速補打，更應留下一個模型範本，供日後替換。至於已故者，唯一辦法就是用玻璃封上。」翁靜晶反問：「究竟找新世界，還是找康文署好？」相信係想向打造星光大道嘅新世界發展有限公司，或政府康文署(康樂及文化事務署)反映意見。

不過翁靜晶翻查星光大道官網，佢再寫道：「這公司連電話都冇！甚麼管理公司？」有網民回覆：「我覺得新世界只係管理，實權可能在康文署手。」想反映意見都唔易㗎!