廿年前，東亞老闆林建岳為咗王祖賢同謝玲玲離婚。講到王祖賢，岳少阿媽余寶珠就話當個仔「叫雞」；至於謝玲玲，余寶珠就話佢係「永遠新抱」。
咪以為得個講字呀，呢廿幾年，每逢林家有乜紅、白二事，謝玲玲都以女主人身份咁出席。早兩日，佢同岳少生嘅細仔、24歲嘅林孝能終於大學畢業，阿媽謝玲玲、大哥林孝賢、龍鳳胎家姐林心兒都有飛去美國出席畢業禮，而大家姐恬兒因為就嚟生B、二家姐愛兒嘅passport過咗期，所以嚟唔到。
至於身為老竇嘅林建岳就幾忙都要出席「兩公婆」同場合照已經難得，最驚喜係兩個齊齊着咗綠色情侶裝，唔知係約埋一齊吖？定心有靈犀先？
