黃秋生去年在雨傘運動，因為發表言論反對警方濫用暴力，被指撐佔中而成為內地封殺對象。他透露已有一年沒有戲拍，有十幾人要養的他經濟出現危機，雖然如此仍無悔去年發表的言論，只以「殺錯良民」形容整件事。對於多次在微博被導演王晶開火指罵，秋生斷然沒戲拍亦不會接拍對方的電影，以「大丈夫有所為，有所不為」來回應。
撰文：何永寧
黃秋生前日為明年再次公演的舞台劇《狂揪夫妻》宣傳，在紅磡接受訪問。計落過去一年他除了跟吳君如合作過《狂》劇，以及拍無綫正在播出的台慶劇《梟雄》外，秋生似乎受雨傘運動時發表過反對警察使用暴力的言論影響，目前處於半停工狀態。
經濟陷危機
秋生不諱言指不計客串在內，差不多一年沒有戲拍，他表示沒必要去了解原因：「做乜要了解？仲使乜了解點解啫？唔需要了解。Let it be呀嘛。經濟係有壓力，冇收入就有壓力㗎啦，我一個人養十幾人，經濟梗係有壓力。人生就係咁，你有困難嘅時候，先顯示到你人格，磨煉到你。好似𠵱家個人又唔熱又唔凍，涼緊冷氣，然後同人講『我好忍耐㗎』，你忍耐啲乜嘢。好多人空口講白話，話愛國嗰啲最多。啲愛國者一號、二號全部空口講白話。」
秋生承認經濟上有危機，但不足以打擊自己：「搵錢就停晒，又唔知發生乜嘢事，前景又唔知點樣，當然係會覺得有危機，但人生幾時係冇危機嘅呢？人生就好似一個旅程，人生隨時都有危機，講得誇張啲，我幾時死自己都唔知啦。如果人生成日諗呢啲，你嘅人生不但唔可以繼續向前行，而且每分每秒都會好唔高興。呢個時間，完全係畀我一個提昇，一個試煉，而且呢個試煉，又唔係衰到要死喎，咁先好吖嘛。」
「從來唔後悔」
談到跟導演王晶因去年雨傘運動在網上開火而埋下積怨，面對經濟壓力的秋生仍斷言不會接王晶的電影，他說：「唔會（接），大丈夫有所為，有所不為。咁樣唔等如執着一個仇恨，係費事大家尷尬。無謂多是非，無謂俾人講。」亦不會邀請對方去看自己的舞台劇，秋生說：「唔會，我哋亦唔係朋友，亦唔會返到轉頭。只要唔好再有互相謾罵攻擊，再加以陷害，再踩多腳就算嘞，阿彌陀佛。」
由反暴力而給人偷換概念變成支持佔中，秋生斷然沒有後悔去年的言論：「後悔乜嘢？後悔我自己hea足成年？我唔會。我從來唔會後悔，因為我諗嘅嘢，我講嘅嘢，我做嘅嘢，其實人哋點樣理解，我係唔能夠控制。呢個就係我嘅人生，我要面對，我就係有咁多風浪。咁有乜嘢要後悔？如果要推到最後，就係我要後悔點解當初要投胎，我唔應該嚟……所以冇後悔。」
場地：逸．酒店
|
鍾意就快D Share啦！
|
|
|
