鍾嘉欣上年同脊骨治療師Jeremy喺溫哥華行禮，佢哋將於溫哥華時間周六補擺酒，噚日當地時間11點幾左右，《蘋果》獨家影到見鍾嘉欣家姐拎咗三盒馬卡龍，去Jeremy屋企，為怕被傳媒影相，胞姊喺門口撳咗鐘，兩、三分鐘先有開門，男家嘅人亦好小心，只係匿埋一角開門，啲馬卡龍以白色及粉紅色為主，睇嚟係嘉欣婚宴上要用，鍾嘉欣家姐逗留到3點半就離開。鍾嘉欣嘅facebook今早亦貼出婚紗相做個人頭像相，相中所見，嘉欣BB大晒幸福笑容，似乎係《華麗轉身》嘅劇照多啲，當時係講鍾嘉欣嫁畀方力申一幕；據知鍾嘉欣婚宴將於Arbutus Club舉行，屬溫哥華私人俱樂部，有提供婚宴服務，而最大賓客房可以容納2百人，而且採用終身會籍，入會費要成約30萬港元，只招待會員。今日亦有周刊指，嘉欣BB當初同奀星伍允龍分手，透過家姐認識，個男仔大過嘉欣13、14年，家底唔錯，見過幾次面，嘉欣BB都認定咗對方，之後先知道對方原來係梁乃鵬嘅姪仔，男友上年8月向嘉欣求婚，佢哋喺聖誕節結婚，嘉欣BB近日先發現有咗，不過暫時未夠3個月，所以冇開口承認，婚後就同老公住喺溫哥華一幢價值過千萬港元嘅4千呎大宅，報道又指，今次嘉欣只請親友，擺六、八圍酒席，好友亦只有圈中「處女黨」成員王君馨、岑麗香、苟芸慧及李亞男等擔任姊妹。
來源 source: http://hk.apple.nextmedia.com
|
鍾意就快D Share啦！
|
|
|
