男神張智霖（Chilam）出名型英帥，不過佢嘅魅力似乎唔夠寶貝仔魔童犀利！依家喺意大利同太太袁詠儀（靚靚）以及囝囝魔童享受天倫樂兼慶祝父親節嘅Chilam，啱啱玩Facebook直播，魔童仲成為直播嘅特別嘉賓。呢段接近四分鐘嘅直播播出後兩個鐘，已經有超過10萬次瀏覽！
踩場搶客
喺直播入面，兩父子齊齊以黑超chok爆上陣，當魔童一現身，大批網民留言大讚靚仔可愛兼夠醒目，點解？事關魔童一見Chilam玩直播，即刻表現得非常雀躍，以英語頻頻同大家打招呼，又指住身上件「The Flash」tee叫大家留意，仲公開呼籲大家瀏覽佢個人嘅instagram戶口，嘩！擺明踩老竇場搶客喎！就連Chilam都忍唔住笑佢喺度賣廣告！
勁主動
全程基本上係Chilam舉機自拍直播，但係魔童就頻頻要求自己舉機，兩父子不斷將部手機搶嚟搶去，當魔童一搶到，就好爆笑咁話：「Never give your phone back！」而魔童見到網民留言亦有問必答，期間有網民問靚靚喺邊時，魔童即刻好醒目咁pan個鏡頭去行喺前面嘅靚靚度。
最好笑係，有網民留言笑問靚靚係咪又去買手袋時，魔童一見到，即刻好緊張大叫反問靚靚：「Mommy, are we going to Hermes again？」（阿媽，我哋唔係又去買手袋呀？）Chilam聞言即笑笑口安撫魔童話唔係。好明顯，魔童平時嘅節目，都係陪靚靚買手袋
玩到唔願停
接近直播尾聲，Chilam幾次提出話要結束直播，但係魔童點都唔肯放手，期間仲拎住部手機跑開，一邊笑一邊話：「Keep Daddy away from me！」呢個時候靚靚先知魔童玩緊直播，見個仔愈跑愈遠，仲好緊張咁大叫：「Be careful！」最後Chilam成功「捕獲」魔童同部手機，先至可以結束到個直播咋！
|
鍾意就快D Share啦！
|
|
|
