林作同「十優港姐」麥明詩(Louisa)屢傳婚訊，早前仲有傳林媽媽買定豪宅，畀佢哋結婚用，趁女友麥明詩返深圳拍劇，林作即刻曳曳，今日凌晨被人影到同一名貌似麥明詩嘅長髮索女夜會，仲即場「抄牌」。今日讀者鍾先生透過《蘋果》爆相爆片，提供幾張林作疑似媾女相及片段，林作一貫官仔骨骨look，拎住部手提電話面向穿上白色低胸小背心嘅「A貨麥明詩」，期間兩人細細聲傾偈，不自覺地頭貼頭，愈挨愈近。讀者鍾先生喺電話度中透露今日凌晨二時半喺銅鑼灣耀華街見到林作和「A貨麥明詩」，兩人最初係同十個八個朋友一齊喺酒吧飲嘢，之後其他朋友分批上咗的士，最後剩番林作同個女仔，見林作不停撳電話，係咪call車？鍾生話：「唔係，當時我哋企個女仔隔籬，到男嘅問女攞電話，個女有啲尷尬。(咁肯唔肯畀？)呢樣我真係唔知。」兩個人等咗一陣，就有架私家車嚟咗接載佢哋一齊離開。為何只載該名索女？林作解釋：「因為另外兩位女士畀咗另一位靚仔架車載走咗，我哋轉場，一架車坐唔晒。」林作表示有預先通知女友外出，但問到可擔心女友呷醋而減少夜蒲？他聲線突然越講越沉：「如果要作古仔，咁就真係要解一解喇，都唔可以……係……哈！有啲驚㗎都。」《蘋果》致電林作問佢媾女單嘢？佢喺電話笑得好大聲：「哈哈哈，(幾靚女又係長頭髮？有少少似麥明詩？)哈哈哈。」咁係咪問人攞電話？林作話﹕「冇攞電話，本身都識佢，Louisa都識，friend嚟架，我哋係成班人，嗰架係我call嘅Uber，唔係我司機。」
|
鍾意就快D Share啦！
|
|
|
