「鼎爺」李家鼎喺《阿爺廚房》教人煮餸，真係估佢唔到，有煮功又有古法粵菜，杜汶澤都話愛上鼎爺：「睇刀功、拋鑊、選料，煮嘅過程每一句都係教材，好detail，自己廚房有自己嘅風格，更重要係平時聲大大嘅佢專注於自己有絕對本事嘅嘢反而唔牙擦，而且難得見到李家鼎柔情嘅一面。」鼎爺廚藝師承喺廣東開酒家嘅老父，父親食得嘴刁，少年鼎爺煮得唔好，老父就一嘢扑落嚟……經歷過家道中落：「以前窮，煮飯買一大嚿豬肉，可以煮足3餐，邊似0依家？材料周圍都買到，好易搞到浪費，所以最想大家都想學下『有衣食』。」鼎爺為節目諗咗九十幾款菜式俾公司揀，謙稱只係屋企人慣用嘅食材，唔係咩「自家秘方」。咁點解搵鼎爺主持呢？鼎爺一次受訪時話，之前曾到無綫某高層家中下廚露兩手，後來傾傾下，咦，鼎爺原來係烹飪高手，一於搵佢主持節目鼎爺話，最初仲以為對方搵佢做搞笑綜藝節目添。估唔到平時硬橋硬馬嘅鼎爺，刀功咁細緻，而且對待食材仲好用心。就連殿堂烹飪主持方太(方任利莎)今日都係微博留言大讚鼎爺：「有聲有藝不卑不亢不自誇題材資料別有風味。」(新聞連結: http://bit.ly/2i2Vemu )方太盛讚，鼎爺噚日接受傳媒訪問時就話﹕「我真係唔知，我都冇理呢啲嘢，多謝佢！多謝佢！」鼎爺透露由選食材、諗菜式到去街市買餸都係一腳踢。辛苦嗎？佢話﹕「都冇咩辛苦，做嘢啫，我做完交咗貨，就算架喇！」不過，方太都有批評鼎爺「旁邊那位姐姐」、即係譚玉瑛姐姐，如果可以少說話更好，鼎爺就好維護譚玉瑛姐姐話﹕「我唔理呢啲嘢，(好有火花？)自然嘢，冇乜所謂。(合作開心？)係0架。」問到會唔會拍第二輯？佢話﹕「唔知喎，好多人問我都真係唔知，等公司安排。」
|
鍾意就快D Share啦！
|
|
|
