活希兒現年34歲，係中澳混血兒，於澳洲出生，佢喺1998年同陳曉東拍牛仔褲廣告開始為人認識，係香港首代o靚模。由於佢「鬼鬼哋」，個樣又sweet，所以好快就走紅，仲不時喺電台及電視台舉辦嘅活動中現身。一早明言愛卡通人物Hello Kitty嘅活希兒，喺1999年更踩入樂壇，當時佢拉埋Kitty落水，唱咗隻《Hello Kitty成為朋友》，出過碟㗎！不過，就係因為呢隻碟，佢嘅星途……睇番啲資料，當年唱片公司報稱賣咗25,000隻碟，但實質只有1,000，加上有傳佢歌中嘅一句歌詞「成日微笑……共聚伴隨着我一起跳高」而辣㷫咗班Kitty fans！自此活希兒成為一碟歌手，形象亦大插水，逐步淡出娛圈。對於活希兒斷送星途其實有另一個講法，有指佢媽咪Bonnie當正個女係搖錢樹，又欠債纍纍，Bonnie要賣樓套現還債，加上Bonnie同第二任老公林磊明有錢銀轇轕等負面新聞，最終令活希兒決定引退，避去澳洲讀書。當時活希兒同「演唱會之父」張耀榮有兩年唱片合約，亦因為活希兒避走澳洲而無法履行合約，但耀榮叔冇追究，仲戥活希兒唔抵，話Bonnie當個女視作天后王菲級數般看待。活希兒返澳洲後修讀法律，正式成為律師，同時亦有同朋友搞時裝店生意。年前佢離開法律界，有消息指佢轉咗去瑞銀（UBS）嘅法規事務部打工，任職聯席董事，月入過10萬。
| （資料圖片） | | |
| | | |
| |
|
鍾意就快D Share啦！
|
|
|
