最近七警同前特首曾蔭權先後被判入獄，唔少市民都對佢哋嘅獄中生活非常好奇，退休懲教人員吳廣明(吳Sir)亦喺fb回應咗好多網民嘅疑問，以下就有9條假設題和處境題問問吳Sir！第一條，唔少人都會問：「曾生同七警使唔使通櫃o架？」當然，現時已經用X光機檢查，但假設曾生想揀通櫃，唔過X光機又得唔得呢？吳Sir就話，「咁要問你點解囉，你要求唧，可以拒絕你o架嘛！」不過吳Sir補充，「o依家其實無取消通櫃呢樣嘢，通櫃係防止藏有毒品，如果犯人涉嫌毒品案，我無估錯仲係用緊呢個方式。」第二至五條係根據曾蔭權過往嘅生活習慣同喜好而假設，如果佢想喺獨立倉養錦鯉得唔得呢？或者DIY一個煲呔戴又可以嗎？放風時可唔可以吹口哨？間唔中嗌下「起錨」又得唔得呢？吳Sir喺片中都有一一解答。ff完，第六至九題係處境題，上個月27日出冊嘅劉夢熊話，坐監令佢成功減肥，瘦咗34磅，坐監係咪一定瘦呢？吳Sir話一啲都唔出奇，主要係飲食問題。佢話好多犯人初期最頂唔順係一朝早食一大碟飯，「你幻想下，以前朝早食餐蛋麵，突然間叫你食飯，仲要係肉飯，我大膽講好多人三個月內，嗰碟飯都食唔到一半！」第七題，喺俗稱水飯房嘅獨立囚室生活係咪好難捱，沖涼都被監視？吳Sir話：「曾蔭權話沖涼有人睇住，話咩崩潰，都無辦法o架，呢個係懲教人員嘅一項工作，老實講，我哋都唔想，我哋都唔鍾意睇佢沖涼，有乜好睇呀？」至於生活時間表，吳Sir話一般朝早7點嗌犯人起身，之後安排食早餐，食完早餐就要開期數（工作），午餐後亦係開工時間，而晚飯後就休息，會安排犯人睇電視、行街、打波等，晚上10點熄燈。由於曾蔭權係獨立囚禁，所以會留喺倉內工作，吳Sir估計會安排佢黐信封，「呢項工作對香港貢獻好大o架，政府嘅黃色紙皮、白色信封等，全部係犯人黐出嚟o架！」吳Sir又話犯人唔可以自己要求加班，但係懲教職員安排加班就得，「要犯人開OT我哋都要申請，犯人係受勞工保障，以前SARS就試過，因為趕住要口罩，但係OT都唔常見。」第八題，曾生同七警都要洗廁所？吳Sir話：「自己用咪自己洗囉！有人問曾蔭權使唔使自己洗底褲，入面好多犯人都係自己洗底褲o架！」吳Sir坦言，「你睇戲都睇過，當你入咗道大閘，『嘭』一聲閂埋門，叫你除衫、檢查、打指紋，由嗰日起就只有犯人基本尊嚴，喺出面點都好，對唔住，入到嚟所有犯人都一樣！」第九題，有市民撐七警話要求特赦佢哋，機會大唔大呢？吳Sir話估計唔會特赦，「香港係有特赦，但係通常特赦出嚟嘅係患有絕症。」佢又話，聽過有警察話驚自己係下一個，吳Sir就笑笑口話，「你唔打人咪唔會係下一個囉！答案好簡單之嘛！」記者：鄒倩婷（阿仙）
攝影：峰
剪接：Roy
編導：Kaman
| 七警同前特首曾蔭權先後被判入獄，唔少市民都好奇佢哋嘅獄中生活係點。 | | |
| | | |
| |
|
鍾意就快D Share啦！
|
|
|
