近排香港出咗個神童，譚芷昀（Celine）得9歲人仔就殺入美國才藝節目《America's Got Talent》（全美一叮），獻唱國際天后Celine Dion嘅首本名曲《My Heart Will Go On》，睇到成班外籍觀眾同評判O晒嘴，𠵱嘩鬼叫，個個起晒身拍晒手連個heart都跟住佢go on，我Nuts哥覺得感動位唔係Celine唱功有幾勁，而係咁細個就可以實現到夢想！大佬！夢想呀！唔好話9歲，有好多做咗大半世人都唔知何謂「目標」！ Celine唱完仲要補多句：「This is the best day of my life！」即係話：「今日係我人生中最正嘅一日！」可想而知呢個小妹妹完全知道自己要啲乜，犀飛利！
捱眼瞓睇卡通片
Celine今鋪咁威水，揚威國際為港爭光，連天后Celine Dion都忍唔住喺社交網站大讚佢可愛，呢啲冇得做媒啩？雖然贏得成千上萬嘅網民畀Like叫加油，但亦有人葡萄話佢唱得冇感情，應該讀好書先，Celine老竇譚順生仲大鑊，被爆撬薛家燕啲學生、當個女係搖錢樹、質疑埋佢個人資歷，負評一大籮，我Nuts哥都係嗰句「關我家事」咩？最重要係究竟Celine係咪鍾意唱歌先？你真係肯定佢唱歌係被迫？一定受盡地獄式訓練？睇佢喺台上用流利英語盡力要話畀大家知，有幾享受同熱愛唱歌，絕對真情流露，逼都逼唔嚟喇！Celine鍾意唱歌嘅程度係等於呼吸一樣重要，一瞓醒就唱唔停，食飯搭車沖涼冇停口，連佢父母撳都撳唔住！咁細個就成日搭長途機去比賽好可憐？呢個反而係佢鍾意比賽嘅原動力！
除咗唱歌，睇電視睇卡通片都係Celine命根之一，佢話搭長途機唔會攰，因為平時好少機會有時間睇電視，搭飛機可以任睇唔嬲，捱眼瞓都要睇餐飽。咁你又咪以為佢唱歌只係為咗有電視睇，佢話仲可以感受到愛！原來佢平時都會去老人院唱歌畀公公婆婆聽，佢話：「我真係好鍾意唱，因為感覺到有愛！」咁細個已經識得以歌聲安撫心靈，唔係親身感受嘅話，點會講得出！有老友話最記得有次落住雨Celine都堅持要出場兼話：「唱歌係要尊重觀眾同舞台，觀眾係想欣賞表演。」佢老竇聽到都嚇咗一跳！
最想阿妹一齊唱
估唔到香港出咗個神童，竟然爭議聲蓋過掌聲，點解唔諗吓有天分都需要後天培養，當年天后Celine Dion都係12歲被人發掘入行為咗培養個女，Celine父母情願捱貴租搬去山頂住方便讀國際學校，爭取時間讀書同練歌，乜騷有錢冇錢都唱。話Celine老竇係怪獸家長？支持個女發展天分同興趣有咩錯？係咪跟大隊朝六晚十默書測驗操TSA無間做，呢啲就係快樂童年？Celine話每日練歌最享受係同爸爸jam歌，有時媽媽都會唱埋一份，齋諗個畫面都已經夠溫情！其實Celine另一個願望，係希望同月同日生日嘅妹妹Dion 快高長大，因為佢想同最愛嘅妹妹上台唱歌，名副其實係Celine Dion！一個小朋友可以有機會盡展所長，搵到自信同快樂，其實大家畀多啲鼓勵，係咪世界更美妙呢？
|
鍾意就快D Share啦！
|
|
|
