天文台下午5時20號發出8號風球東北烈風或暴風訊號，而「生煎包王」蕭潤邦（Oscar）的生煎包大埔分店於明日（13）號正式開張，對於天氣惡劣可能影響開業，Oscar接受東網訪問時表示：「其實間舖都試業超過一個月，所以呢個日子一早定咗，就算打風落雨都唔會改，我已經準備就緒，點都要開張。」有謂他是「貴人招風雨」，Oscar則說：「呢啲貴人我寧願招少少好啦，我想陽光普照好啲，因為天氣咁差，我又book咗舞龍舞獅，怕地太滑，啲師傅會跣親，安全最緊要。」
同江若琳風雨同路
另外，Oscar又表示擔心新舖開業請了圈中不少朋友前來試食，如洪卓立、鍾舒漫、陳柏宇、何遠東及剛坐月完的謝安琪（Kay），但如果天氣太過惡劣，他或會親自逐一致電朋友不要前來。他說：「因為舖頭個位比較偏遠，唔想佢哋咁辛苦嚟撐我，如果嚟唔到唔緊要，我銅鑼灣間店都會開張，到時再請佢哋嚟。」他又指謝安琪（Kay）夠老友，每間店開張必來支持。問可會叫女友江若琳不要出席新店開幕，他說：「就算我叫佢唔好嚟，佢都會嚟，我哋係風雨同路。」
開舖首陷危機
Oscar又說大埔店是他旗下第八間食肆，但今次卻遇上從商後第一次「大麻煩」事，令他相當頭痛，他說：「做飲食業，一向都係師傅大過老闆，以前啲師傅幾惡、幾麻煩我都可以忍，但今次第一次頂唔順，呢間舖有三位師傅，但其中一位提出咗一啲我唔可以接受嘅嘢，唔係加人工咁簡單，我唔答應，佢就突然玩失蹤三日，搞到其他師傅做埋佢啲嘢，直接影響咗食物水準，有食客同我『溫馨提示』食物水準問題，我唔通同食客講有個師傅失蹤先搞到咁咩？點知第二位師傅又突然話唔做，結果搞到我要暫業一日，要立即開大會，攞番個主導權返嚟。我知呢啲唔係藉口，我想借東網同大家講，希望大家畀一次機會我，我唔會再令大家失望。」
拍拖後生活變燦爛
Oscar和江若琳（Elanne）自拍拖後不時在網上「晒恩愛」，日前兩人跟趙學而等好友遊船河，見穿上大露背泳裝的Elanne和Oscar黐到實，Oscar更以半裸造型親手炮製包點餵女友。而近日網上流傳一輯他為大埔新店拍攝的宣傳花絮照，相中見他左手手腕出現一個「E」字，字母頂還有小皇冠，擺明是為女友而紋的「愛的紋身」，Oscar提及手部的紋身時，他表現得相當扭擰，頻說：「咁肉麻。（愛嘅紋身？）因為我有個朋友係紋身師傅，如果依一刻要紋一個字，就一定係『E』囉。（點解紋身彩色咁繽紛？）我想講自從同Elanne一齊後，我生活變得好燦爛。」
|
鍾意就快D Share啦！
|
|
|
