歐錦棠未演出前就已經意外拗柴，今次仲喺台上發生意外，兩度受傷！
藝人歐錦棠近年都忙於演出舞台劇，之前仲特登去為舞台劇操肌，點知未演出前已經意外拗柴，但敬業嘅佢依然堅持演出。不過話口未完，點知佢又再整傷，今次仲要「跌斷手」！今日凌晨，佢喺社交網站上載咗兩張受傷嘅相，佢留言話：「在今天（17日）下午場演出時在台上再出意外，失足跌斷了手。在地上眼看自己的前臂已扭向外邊，且不能動彈，便知道左手玩完，刻下用盡所有力氣去完成剩下的舞蹈，邊走入後台，左臂的扭曲模樣很嚇人。晚上還有最後一場演出，去到醫院，陪同的製作人員也不斷把我當情況向監製報告，我還未出聲，趕到醫院的斯敏便很堅定的向製作人員講：話畀監製聽，阿棠今晚係一定會返去演出嘅！當下心裏有很大的欣慰！有這麼一個了解我又同樣尊重熱愛表演藝術的知己老婆！終於完成了馬丁路德音樂劇，感恩。The show must go on !很感謝救護人員和醫院的醫生和護士很細心照顧。」
佢受咗傷都照演出，網民都讚佢專業，仲有人話睇見張相都嚇咗一跳，笑言佢係容易受傷的男人，叫佢唔好再咁搏命添！
其後，他接受東網訪問時透露不用多作休息了，稍後更為另一套舞台劇《男女PK大作戰》開始綵排：「我尋日左手手踭甩骹，好痛㗎，但做埋佢啦，之後先入醫院，醫生幫我照完話冇乜骨裂，打咗石膏，但醫生幫我整咗個玻璃纖維托，叫我留院一晚，但我唔肯點都要返去演埋夜晚嗰場，都好感恩，我食咗消炎藥都冇咁痛，老婆好明白我嘅熱誠，佢仲喺我入院暈暈哋時，影咗我一張相，畀我作為紀錄，佢咁支持我都好開心，所以痛都冇所謂！（之後可以休息一下？）唔使喎，我之後都要為《男女》開始綵排！」
來源 source: http://hk.on.cc
|
鍾意就快D Share啦！
|
|
|
