【新增影片】港股重挫，驚現小股災。訊匯證券行政總裁沈振盈「沈大師」認為，「如果你講係中資民企、或者北水股，就真係可以話係股災，跌幅好大，好多都穿晒100天線。」當提到現時市況凶險，大師指，「都未算，都未到最凶險！最凶險就係大家終於知原來個市玩完咗。」
大師此言一出，難道港股時辰已到？「個市有八成機會，係已經見咗頂。」他指出，國企股跌幅深過恒指，「北水股」、「大媽股」嚴重洗倉，反映內地資金鏈的確出問題。他預期，恒指12月底前會先跌穿28000點。
講到「北水股」，不得不提騰訊（700），「騰訊瀨晒嘢咁佢唔值呢個價，佢瀨落去都好正常，平保（2318）都係（炒得）Over咗。」
他認為，市場對騰訊過份樂觀，「你要靠分拆業務去頂住條數嘅，你睇到核心業務增長會慢咗，咁你唔值70倍PE，最關鍵未來兩季，如果撇除分拆業務，核心業務係咪真係做到四、五成、六、七成增長呢？呢個一定做唔到。」講到騰訊股價預測，預計2018年1至2月份，「我覺得最少去到中期業績嗰吓，佢係去到340蚊造頂，起碼都要到返嗰啲位。」
事實上，早前當騰訊420蚊時，他與羅尚沛對賭，羅尚沛估12月底，騰訊見480元；大師則睇淡，認為會跌至360元，「依家咁情況，有機會到。」
近日不少人炒騰訊牛證都瀨晒嘢，不過市場亦有不少炒友講到，騰訊打穿370蚊牛證重貨區後會從新上路。大師提醒「唔可以畀重貨區去騎劫我哋嘅思維，我哋要計，究竟騰訊值唔值，有牛證重貨區，係加速佢打去呢啲位，唔表示已經跌完。」
另外，「炒牛熊證，買中時當然好開心，但Total Loss都可以好快，要控制注碼。仲有一樣嘢，你哋（蘋果財經）早兩日嗰個故事，4萬炒到40萬，呢啲火上加油，都係加速人去追入牛仔原因啦，呢啲係撥火。」
提到傳統智慧「聖誕鐘，買滙豐」，大師直指，「唔係一個買入嘅理由，如果佢得一早升破80蚊啦」他建議，12月策略是，「如果你唔博嘅就拎住現金，博嘅就只係沽。」
蘋果財經，關心你飯碗
http://fb.com/appledailyatm
|
鍾意就快D Share啦！
|
|
|
