奚秀蘭為宣傳入行五十年推出嘅卡拉ok碟，與老公謝嘉亮齊齊接受訪問，並且唔介意公開二人「長短腳之戀」如何遭到老爺反對，但只以「富家子」交代老公背景，真係令人吊瘾嘞！何謂富家子？到底有幾富？家陣仲富唔富？
實情奚秀蘭夫家喺香港金融史上寫下一頁，光唔光輝就見仁見智。佢老爺謝志超喺創立於澳門的百年老店謝利源金鋪的第三代，提起「謝利源」可能係唔少公公婆婆嘅慘痛回憶，諗起都一殼眼淚。
奚秀蘭老爺謝志超1971年喺香港開設謝利源金行，以有橋夠創新而彈出，佢首推「紙黃金」吸水大法，客仔只需要向謝利源金行買一錢黃金就獲發黃金存摺，跟住客人可以即日嘅價格賣出或買入黃金，等於「篤鼻哥」咁，而且買入嘅紙黃金仲有利息，呢條橋令謝利源喺短時間之內吸水過千萬，同行都為之則目，高峰時有十間分店，可惜謝志超將資金轉投地產，82年中英前途談判，地產狂瀉，反而金價狂升，唔少揸紙黃金嘅客仔湧去謝利源提取實金，由於黃金儲備不足而出現擠提，差啲連累埋謝利源嘅往來銀行恒隆銀行，1982年9月6日，一夜之間10間謝利源「謝晒」要執笠，近千客仔血本無歸，之後奚秀蘭老爺都好「謝」，心情惡劣，自責愧對祖先，85年曾經服食80粒安眠藥企圖自殺，所以話嫁入豪門要佢家族唔好咁易「謝」先至掂㗎！
撰文：宗菁華
相關連結：
【中環人語】美心秘密武器
https://bit.ly/2jYk0U2
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
