一個長頭髮染咗些少金毛嘅少女，淨係着住內褲、無上裝、冇着鞋喺條馬路度浪蕩，其間又喊又叫，見到都心酸，究竟受咗乜嘢刺激令到佢咁失常呢？前日下晝4點幾，讀者陳先生放工後沿長沙灣道向深水埗方向行去搭巴士，行到近長沙灣消防局嘅行人天橋底嗰陣，聽到前面有人大嗌。
的士避開唔敢載
當佢行近嘅時候，就見到個年約20歲嘅女仔，喺3線行車嘅長沙灣道向荔枝角方向慢線，逆線而行。陳先生話初時見個女仔好似想截的士，有架的士駛埋去，但懷疑司機見到個女仔冇着衫，唔敢載佢，切去中線避開佢，其他車見佢喺慢線行都避之則吉。個女仔繼續行到去長沙灣遊樂場對開嘅巴士站，行番上行人路踎喺地下大叫大喊，好似打電話。陳先生話個女仔情緒非常激動，淨係聽到佢大嗌「聽電話呀」，言語間似係同情人鬧交，但其他都聽唔清楚。個女仔嘅手臂同大髀都有紋身，陳先生話佢仲好似滾地沙咁碌地，最後坐咗喺地下。陳先生上咗巴士後，見到兩個差人指住女仔個方向行緊過去，應該係有途人報咗警。
警方就話，喺上址見到嗰名19歲少女，佢情緒激動，於是召救護車將佢送院檢查，同時通知咗佢屋企人。希望佢情緒平復番，重新振作
來源 source: http://hk.entertainment.appledaily.com
|
鍾意就快D Share啦！
|
|
|
