53歲的美魔女羅霖今年書展會再推出新書《羅霖凍齡 美魔法Timeless》，當中雖然影了七套泳裝，但卻不是寫真集，它是分享美容心得的工具書。女生愛扮靚，羅霖就覺以開心share做賣點。網絡世界中，靚相最呃like。羅霖在日前在九龍塘接受《蘋果》專訪，就給眾姊妹分享如何擺甫士出鏡會又靚又型又不用P圖，她還親自示範正確和錯誤的甫士。
年過半百的羅霖，明白中女擔心拍照時驚現頸紋和雙下巴，她教路：「好多時，影相時將頭壓得太低就會唔覺意走咗雙下巴出嚟，所以如果大家想塊面尖啲，不妨將頭提前少少就可以避免。點解影相有頸紋，其實頭向後擰一定有，無論後生定老都會有，只要將膊頭卸一卸，將肌肉放番落嚟，頸個位就冇紋。女仔最怕手臂啲bye bye肉影出嚟好大嚿，咁就唔好將手臂擺前，要將手臂放後少少，想條腰幼啲，可以叉叉腰，想對腳長啲，就丁字腳或者交叉腳，咁影出嚟都會修長。」羅霖補充任何人正面入鏡，臉孔都一定會肥，她建議大家影三七臉對着鏡頭，她說：「得閒照多啲鏡，就能夠了解自己邊個部份靚啲。」
羅霖笑言為求出鏡靚，她一定就角度：「擺完甫士可能都腰痠骨痛，但只要出嚟效果係靚乜都得。記得我為新書到泰國影泳裝，因為坐低時肚部有摺紋，我不時提醒自己要挺直條腰，又唔會寒背，拉直咗個人，影出嚟都瘦啲，想知自己姿勢，亦要多啲對鏡頭練習吓，影多幾張。」
羅霖這次出書，早有朋友認購和贊助，未出書已封了蝕本門，還會有餘額可以做善事，捐助慈善機構。回想構思和籌備新書時，一度遇上重重難關，羅霖獨力解決，「我當時好大壓力，側邊仲出現甩頭髮，一梳啲頭髮就係咁跌落嚟，以前生完BB都冇咁犀利，我知係壓力造成，所以休息多啲，食番啲營養補品，而家情況好轉番，見到本書達到自己要求，我都問心無愧。」
失婚後的羅霖，由濶太變單親媽咪，母兼父職照顧三名兒子，為了讓囝囝成長中得到最好，她不惜搏命搲銀：「我咁搏命當然為佢哋三個，不過，我都覺得人嘅一生，生命有限，要盡量學多啲，做多啲，到將來年紀大，問番自己，我呢一生係咪無憾，我冇浪費咗自己人生。我鍾意學嘢，我鍾意做嘢，我每年係會畀自己一個目標，達到就會好開心，好有成功感，我永遠只會同自己比較。」
羅霖的三子仍在求學，兩子都升大學，幼子則讀國際學校，她又要照顧雙親，每月開支龐大：「三個仔啲學費，同屋企開支，計計埋埋一個月起碼都6位數字。大仔轉過幾個主科，佢讀過藝術、法律，而家轉咗讀電腦設計，我成日話佢讀藝術搵唔到錢，二仔就讀心理學，佢實際啲，我安慰啲，我同二仔講，叫佢讀完先醫下自己，了解吓自己情況先。都巿人好緊張，情緒病都多咗，好需要人傾偈，所以醫埋屋企人先出去醫人，唔係話代表屋企人有情緒病，而係想令大家做人開心啲，乜都睇淡啲。」
以羅霖由離婚到振作復出，人生都走過不少崎嶇路，回顧那些日子，「我梗係有爆喊，全部閂埋門先喊，我從來唔會喺小朋友面前喊，我唔會將自己啲唔開心同壓力俾小朋友見到，佢哋已經係單親家庭，唔想將我嘅唔開心加落佢哋度，佢哋會有陰影。」一旦遇上壓力爆煲，羅霖就會自閉：「我會閂埋門祈禱，都喊濕好多個枕頭。」即使再傷痛，羅霖最後還是理智把關，她續說：「但如果我知道聽日有嘢做，我會忍住唔喊，盡量用聽音樂或睇書去分散注意力，因為喊完，第日出嚟嘢會眼腫唔靚，做我哋呢行，時刻都要保持最好狀態。」
羅霖的美容書推出，三子又放暑假，她可會乘機獎勵自己出埠旅行，她坦言：「旅行其實係獎小朋友，唔係獎我自己呀，自從有咗小朋友後，所有旅行都係為佢哋而設計，我以前做過空姐6年，好多地方我都去過，好多嘢都食過，睇風景同買嘢，我後生做過晒，而家有咗小朋友，去旅遊地點，食乜玩乜，全部問佢哋，我只係陪食、陪玩同畀錢嗰個。」羅霖絕對是二百分好媽咪，她卻說：「盡量做，我有時都不足，我哋關係係朋友，而家做媽咪要包括好多角色，又係朋友，又係媽咪同玩伴，將來囝囝佢哋如果拍拖，我唔會擔心，仲歡迎佢哋帶女朋友返嚟，佢哋帶番嚟，我會開心迎接同接受，我仲會對佢哋啲女朋友好好，會送嘢畀佢哋。囝囝而家咁細個拍拖，幾時得到結婚。」羅霖謂還會教導囝囝待女朋友必須有風度：「 就算分手都唔好講對方壞話，和平分手要講得清清楚楚，唔好一腳踏兩船，要有紳士風度。」現在羅霖正單身，她暫時不敢去覓第二春：「我自己感情放低，好多工作，又要先照顧好三個小朋友，我又係爹哋，又係媽咪，我分唔到時間去拍拖。」難道不想脆弱時有個膊頭依靠一下嗎？羅霖說：「好想有個膊頭挨下，但而家挨住囝囝先啦，我對感情好專一，一拍拖會好投入，拍拖一定有開心同唔開心，如唔開心，再加上工作壓力會好易爆煲，所以我暫時專注工作先。」
撰文：比華利
攝影、攝錄：林德雄
場地：Hair Salon
髮型：Jay Cheung @Hair Salon
化妝：Peggy Tsui
|
鍾意就快D Share啦！
|
|
|
