賭王三房索千金何超蓮曾與比她年長12年的台灣男歌手吳克群拍拖，2015年結束了4年情，去年承認和大陸男演員竇驍拍拖。當年超蓮和吳克群表面上是和平分手，但有傳真正原因是男方多次偷食。日前周揚青大爆羅志祥的荒淫性生活，超蓮在周揚青的帖文感同身受留言：「你經歷的我也經歷過，我知道那有多痛，很佩服你的勇敢，加油我的胖胖。」
前日何超蓮接受森美和火火主持的商台節目《公子會》訪問，除了談及家庭和事業外，更聊到感情生活，當中亦提到該段感情創傷，坦言不獲前男友尊重，就連媽咪陳婉珍當時也對她說：「你會唔會覺得，佢真係好唔尊重你。」不少網民聽完節目後，都猜測對方就是吳克群。
超蓮先聊到在英國讀書時，遇到一次被有錢男同學搭訕的深刻經歷，她笑說：「行緊返學校，當時聽緊耳機，有個矮矮肥肥男仔行埋嚟，喺面前做個拎開耳筒手勢，我心諗做咩呢？佢講自己咩名，然後話『我覺得你應該要識我』，我當時聽完『哦』咗一聲就繼續行。」不過之後她和該男同學亦成為朋友，過了多年偶爾也會拿這件事來取笑對方一番。超蓮直言年幼時媽咪管得嚴，放學後即被接回家補習不能出街，直至中學畢業後才回復自由。
不過求學時期也會拍拖，她指以前男朋友仔因為拍拖跟她去了英國，而放棄了本來想讀的飛行訓練課程：「係好耐之前。我覺得好傻，唔應該為咗女朋友去改變自己。我會鍾意啲有目標嘅人，最好大家唔同feel，我識嘅佢未必叻，佢識嘅做得好好，已經諗好條路點行，好有遠見嘅一個人，我都會鍾意。」
超蓮被問到會否被家人提醒過不要太相信男人？她笑言：「我媽係相反，佢會覺得橫掂都係畀人呃，年紀仲細撞多啲板係好，寧願30歲之前撞板，30歲之後知自己想要啲咩。拍拖，媽咪冇咁限制，鍾意拍乜就拍，咁梗係唔好一腳踏兩船、兩三禮拜換一次佢可能會得閒提一兩句，話我聽到呢啲唔係咁好，叫自己注意吓，佢會寧願我哋自己遇到個唔好，自己受咗傷就會知。」
森美問超蓮第一次撞板後有否回家傾訴？超蓮坦言：「我記得有一次發生咗啲事，令我發現呢個人係好唔尊重我，我原本以為嗰件事得我自己知，唔知點解我媽又知喎！我媽煮咗成枱餸，我好開心食，突然我媽話『阿妹，我見到啲咁嘅嘢，係咪發生咗啲唔好嘅嘢定係點樣？』跟住我嗰吓覺得，噢！原來連我媽都知，咁我就好心痛，點解會影響埋我屋企人呢！總之我媽好唔開心，我就覺得係我錯，我唔應該一意孤行，係都要同呢個人一齊囉！跟住我就好快分咗手喇！」
超蓮更不諱言這些事發生過多次：「其實係接二連三好多次，我每一次都畀藉口佢，直到嗰一吓我媽都講話『你會唔會覺得佢真係好唔尊重你？』」森美問她為何會相信對方？超蓮直言：「咪就係傻囉！我當時好細個，鍾意咗就鍾意咗，同埋佢好識講嘢，好多嘢佢一講我覺得有道理，好易畀人0氹，明明嗰件事佢好主動去傷害我，佢解釋話唔係因為傷害我而做，講到件事本身係合理，只係你冇接觸過啫！其實好多人都係咁做㗎啦嗰類，會話我細個未接觸過，其實個個都係咁，我又衰唔輸得，好覺得唔係我咁樣你都會出去...（森美搶問：拈花野草？）係唔忿氣，真係好傻，直頭係浪費咗好耐（時間）。」
火火接着問：「直頭係對住一個佢唔鍾意你、玩弄你嘅人，你希望感動佢？」超蓮即說：「係呀，係呀，就係咁喇！呢啲男人溝女方法好鍾意若即若離，令你覺得控制唔到佢，段關係你永遠佔下風，咁個女仔反而會更加努力去討好。」超蓮自言不會讓自己重蹈覆轍：「輸過一次就唔會，當你知道個套路，就唔會再踏入去。唔會用挑戰自己嘅心態，大家三觀（價值觀、世界觀、人生觀）要好夾，對方要孝順，唔好有咁多奇怪嘢，你唔會再想挑戰呢啲嘢，只會覺得好麻煩。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
